नेवाःतय्गु राष्ट्रिय संगठन नेवाः देय् दबू न नेवाः छेँ दयकिइगु जुगु दु। देय् दबू न छगु पत्रकार सम्मलेन याना नेवाः छेँ दनिइगु जानकारी बिगु खः।

हलिंन्यंक च्वनाच्वफि नेवाःपि नाप थीथीं खलः पुचः व दातापिन्त ग्वहालि यायेत इनाप देय् दबूया नायः पवित्र बज्राचार्यं पत्रकार सम्मलेनपाखे इनाप यानादीगु खः। वयलकं प्रेस विज्ञप्ति ब्वना न्यंकादीसे वयकलं विशिष्ट कला, संस्कृति, भाषा, साहित्य संरक्षण व प्रवर्द्धन यायतलिसें नेवाःतयत राजनीतिक आर्थिक, सामाजिक व सांस्कृतिक कथं धिसिलाकेत व सचेत याय्त, अले राज्यसत्ताय् थःपिनिगु पहिचान, पहुंच व प्रतिनिधित्व सुनिश्चित यायत नेवाः देय् दबूया पलिस्था जूगु खः धकाः न्ह्यथनादीगु खः।

नेवाः देय् दबुलि नेवाः छेँ धस्वाकेधुंकाः उगु छेँयात केवल संस्थाया कार्यालय भवनय् जक सीमित मयासें सकल नेवाः समुदायया हे हित जुइगु ज्याय् छ्यलेगु आज्जु नं तयातःगु दु । नेपालभाषा, संस्कृति, साहित्य, लिपि, संस्कार आदि विषयलय् अध्ययन अनुसन्धान लगायत स्वास्थ्य, शिक्षा, कानूनी परापर्श आदि विषयलय् सुचना सेवा माःपिन्त अपु्क्क चुलाकेगु केन्द्रया रूपय् तकं छ्यलेगु योजना दयका तःगु दु ।

गु नेवाः छेँयात नेवाः वसः,तिसा लगायत दैनिक जनजीवन छ्यलीगु लवःकवःया  प्रदर्शनी, भाषा, साहित्य ख्यलय ज्वःमदुगु योगदान यानावंपिं भाषाह्यःमि साहित्यकःमि, न्ह्यलुवाः आदिपिनिगु किपा प्रदर्शनी गोष्ठी, सभा समारोह, सेमिनार आदि संचालन याय्गु थाय्या रूपय् नं छ्यलेगु,  नियमित नेपालभाषा, परम्पराग, नृत्य, लिपि प्रशिक्षण सीपमुलक तालिम आदि न्ह्याकेगु ज्याय् समेत बहुउपयोगी भवनया रुप छ्यलेगु व छ्ययकेत थाय् उपलब्ध याकेगु नं आज्जु तयातःगु दु ।

उगु छेँ येँ महानगरपालिका १५ वडाय् दयकिइगु जुगु दु सा च्यागू करोडया बजेट तुइगु अनुमान यानातःगु दु। नेवाः छँेय् धस्वाकेगु ज्याखँय् सकल नेवाःतसें थःथःगु थासं आर्थिक ग्वहालि यायगु सुअवसर वयाच्वंगु दु । दबूया सल्लाहकारपिं डा.महेशमान श्रेष्ठ व डा. पुष्पराज राजकर्णिकारं नेवाः छेँया डिजाइन उलेज्या यानादीगु खः।

Categorized in राष्ट्रिय