२०८० जेठ २६, शुक्रबार

कोथुननी बचाउ अभियानं सांसदपिन्त ध्यानाकर्षणयात

लहनान्युज | चौलाथ्व दशमी ११४३, चैत्र १७ शुक्रवाः

असन कोथुननी बचाउ अभियानं संघीय सांसद व बागमति प्रदेशया सांसदपिन्त थःपिसं यानाच्वंगु आन्दोलनया बारे खँया जानकारी बिःगु दु।

संघीय सांसद गणेश पराजुलीलिसे प्रदेशसभा दुजःपिं नुरज वज्राचार्य, सैलेन्द्र वज्राचार्य व हरिप्रभा श्रेष्ठ खड्गीपिनिगु उपस्थितिइ असंया कुथुननी गुथि संस्थानं दयेकेत्यंगु विजनेस कम्प्लेक्सयात कयाः जानकारी याकूगु खः । अभियानया कथं बागमति प्रदेशया फुक्कं सांसद लिसें येँया मेयर, उपमेयरपिंत नं सःतातःगु खःसां वय्कःपिं लिसें आपालं सांसदत उपस्थित मजूगुलिं दुःख प्वंकूगु खः ।

सांसदपिंत लःल्हाःगु पतिइ कुथुननीया सम्पदायात व्यापारिक प्रयोजनया नितिं बीबलय् सम्पदा लिसें सम्बन्धित मूर्त अमूर्त सम्पदा नष्ट जुइफइगु, नक्सापास दिकेमाःगु आदि माग याःगु खः । ज्याझ्वलय् न्ववायेगु झ्वलय् सांसद पराजुलीं संस्कृति व सम्पदा देय्या हे सम्पत्ति जूगु धासें उकियात संरक्षण यायेगु नितिं संरक्षण योजना दयेकेमाःगु खँ धयादीगु खः ।

उकथं हे प्रदेशसभा सांसद हरिप्रभा खड्गी श्रेष्ठं थः न्ह्याबलें नं संस्कृति सम्पदाया संरक्षण यायेमाः धइगु पक्षय् दुगु धासें थम्हं फुगु कुतः यायेगु खँ धयादीगु खः ।

अभियानया संयोजक नमस्ते साय्मिया सभापतित्वय् जूगु ज्याझ्वलय् नेवाः न्ह्यलुवा उमेश स्थापित व सुरेश श्रेष्ठपिंसं नं थःथःगु बिचाः तयादीगु खः ।

Categorized in राष्ट्रिय