बुंगद्यःया प्रतिमूर्ति स्थापना विवाद
लहनान्युज | चौलाथ्व चतुर्दशी ११४३, चैत्र २१ मंगलवाः
नेपाःया दकले ताःहाकःगु जात्रा कथं बुंगद्यया रथयात्रायात काइ । थ्व हे बुंगद्यःया प्रतिमूर्ति किपुलिइ तय्धुंकाः न्ह्याःगु विवाद प्यला बीधुंकलं नं ज्यनेमफुनि । बुंगद्यःया प्रतिमूर्ति दय्काः आःतक्क सार्वजनिक थासय् तःगु इतिहास मदुनि । किपू २ स्थित प्यंगःथामय् प्रतिमूर्ति स्थापना याय्धुंकाः प्रतिमूर्ति तय्ज्यू वा मज्यू धकाः सार्वजनिक बहसया विषय जूगु दु ।
किपूया सुखी गःछेँ समाजया अगुवाईलय् वंगु मंसिर १५ गते विहीबाः उगु मूर्ति स्थापना याःगु खः । वयां न्ह्यः यलया महाबौद्ध परिसरय् छगू समारोह दथुइ येँ महानगरपालिकाया मेयर बालेन्द्र शाहं उगु मूर्ति हस्तान्तरण याय्धुंकाः सलंसः भक्तजनलिसें मूर्ति किपूपाखे यंकूगु खः । महानगरपालिकाया करिब १७ लाख तकाया ग्वहालिइ मूर्तिकार लिसें सम्पदा अभियन्ता रवि शाक्यं उगु मूर्ति दय्कूगु खः । वधुंकाः बुंगद्यःया प्रतिमूर्ति दय्कूगु धासें हयग्रीव भैरवनाथ अले ३२ पानेजु संघ, बुंगमतीं मंसिर १९ गते विज्ञप्ती पिथनाः विरोध याय्धुंकाः विवाद न्ह्याःगु खः ।
बुंगद्यःया रथयात्राया झ्वलय् थति त्वालं जाह्वलाख्यः यंके प्यन्हु न्ह्यः पानेजुपिं किपुलिइ वनाः याकःमिसायाथाय् स्वां छाःवनेमाःगु परम्परा दु । किपुलिइ मूर्ति स्थापना याय्धुंकाः धाःसा उगु थासं मूर्ति मचीकूतल्ले अन स्वां छाःमवनेगु अडान पानेजुपिन्सं तःगु खः । बुंगद्यःया मूर्ति तन्त्रसाधनालिसे स्वाःगुलिं मेगु स्वयां फरक जुइगु पानेजु संघया नायः यज्ञरत्न शाक्यया धापू दु । ‘सलंसः दँ न्ह्यःनिसें बुंगद्यःया पुजारी (जल पानेजु) वनाः शक्ति स्वरुपा याकःमिसायात प्रसाद ग्रहण याकेगु थासय् हे प्रतिमूर्ति तल । याकः मिसायाथाय् प्रतिमूर्ति तय्धुंकाः व हे थासय् बुंगद्यःयात ल्यूने तयाः पुजारीं याकःमिसायात प्रसाद बीमाःगु आवश्यकता दनिला ?’ नायः शाक्यं धयादिल ।
]उखे, मूर्ति स्थापनाया पहल याःम्ह किपूया सुखी गःछेँ समाजया छ्यान्जे नारायण महर्जनं बुंगद्यः व किपूलिसे स्वाःगु परम्परा प्रवद्र्धन याय्त प्रतिमूर्ति स्थापना यानागु धयादी । थःपिन्सं पानेजु संघया परम्परा, मर्यादाय् ध्वकेमबीगु प्रतिबद्धता प्वंकुसें छ्यान्जे महर्जनं धयादिल, ‘सलंसः भक्तजनत साक्षी तयाः यलं यंकागु बुंगद्यः चीकाः गन तय्गु ? मेगु विकल्प छु छु जुइफइ धकाः पानेजुतपिंलिसें सहलह याय्त तयार दु । खुल्ला मनं संवादया लकस दय्केमाल ।’
प्रतिमूर्ति दय्केत प्रथाजनित संस्था पानेजु जक मखसें, गुठी संस्थानयाके नं स्वीकृति मकाःगु गुठी संस्थान यलया अध्यक्ष लछुना शर्मा काफ्लें धयादिल । बुंगद्यःया पुजा याय्त विशेष योग्यता माःगु व यःथाय् प्रतिमूर्ति स्थापना याय्मज्यूगु धासें अध्यक्ष काफ्लें अनं प्रतिमूर्ति चीकाः संस्थानं जिम्मा कयाः सुरक्षित तय्गु धयादिल ।
थ्व हे दथुइ, पानेजुपिनिगु निरन्तर ताकेता धुंकाः प्रतिमूर्ति चीकेगु विभागया निर्णय पालना याय्गु व याकेगुलिइ यल महानगरपालिकाया मेयर चिरिबाबु महर्जन व किपू नगरपालिकाया मेयर राजकुमार नकर्मीं वंगु मंगलबाः जूगु सरोकारवालाया मुँज्याय् ल्हाःचिं तयादीगु खः । बैठकय् उपस्थित सुखी गःछेँ समाजया प्रतिनिधित क्वत्यलाः निर्णय याय्त स्वःगु धासें बैठकया अन्त्यपाखे पिहांवंगु खः ।
प्यंगःथामय् याकः मिसायात स्वां छाःवनेगु जीवन्त संस्कृतियात पौभाः, अंगः च्वकिपा वा मेगु कलात्मक माध्यमं अभिव्यक्त यानाः पर्यटकीय आज्जुया रूपं प्रवद्र्धनया लागिं निगुलिं नगरपालिका जाय्माःगु सरोकारवाला व च्यूताःमितय् छ्याता दु । उगु परम्परालिसे सम्बन्धित थीथी जनश्रुति, प्रचलित किम्वदन्ती मुंकाः पर्यटकयात लक्षित यानाः किपू नगरपालिकां सफू पिथनेगु लिसेंया उपाय लीफइगु उमिगु सुझाव दु ।
