किपू नगरपालिकाया प्यंगःथांमय् तःगु बुगंद्यःया प्रतिमूर्ति चिइकिइगु जुगु दु। उगु थासं चिइका सुरक्षित थासय् तयेगु  निर्णय याःगु दु। प्यलां न्ह्यःनिसे जुयाच्वंगु विवाद आः साम्य जुगु दु।

किपू नगरपालिकाया प्रमुख राजकुमार नकःमि उपप्रमुख सुनीता शाक्य नाप उगु थासय् च्वपि दाफा बाजं खलः नाप सरोकारवालापि म्हिगः बुधबाः च्वंगु बैठकं उगु निर्णय याःगु खः। वंगु पुस २५ गते पुरातत्व विभागं उगु मूर्ति प्यंगः थासं चिइकेगु धासां म्हिगः बुधबाः च्वंगु बैठकं उगु थासं चिइका सुरक्षित थासय् तयेगु नगरपालिकां जिम्मेवारी कायेगु निर्णय याःगु दु।

बैठकय् नगरपालिकाया प्रमुख प्रशासकीय अधिकृत लक्ष्मीप्रसाद बाँस्कोटा, मूर्ति प्रतिस्थापन याःगु वडा–२ या वडाअध्यक्ष रुपेश महर्जन नाप वडाध्यक्षपि, सञ्चारकःमि, सांस्कृतिक अभियन्तापिनिगु उपस्थिति दुगु खः। मेयर नकःमि सोमबाः बाघभैरवय् जूगु छगु ज्याझ्वलय् बुगंद्यः व किपू नाप स्वागु परम्परा, सांस्कृतिक एकतायात ध्यानय् तया उगु मूर्ति चिइकेगु सार्वजनिक रुपं हे न्ववानादिगु खः।

प्रतिमूर्तिया विषय पुरातत्व विभागया लिपागु निर्णय, श्री ह्यग्रीव भैरवनाथ ३२ पानेजु संघ, मूर्ति स्थापना यायेत कुतःयाःपि किपूया प्यंगःथां सुखी गंछें समाजया भावना व आकांक्षा नाप वंगु सुझावयात ध्यानय् तया उगु निर्णय यानागु धका नगरपालिकां धाःगु दु। बुगंद्यःया पुजारीपि पाखे पानेजु संघं उगु थासं प्रतिमूर्ति मचिकूतले अन वना स्वां छायेगु परम्परायात निरन्तरता मबिइगु अडान तयावयाच्वंगु खः।

दँय् दँसं बुगंद्यःया भोटो जात्राया लागि थतित्वाःपाखे सालां यकां जावलाख्यलय् थ्यकेगु प्यन्हु न्ह्यः पुजारी (जल पानेजु) प्रसाद ज्वना प्यंगः थांमय् वना शक्ति स्वरुपा कन्या (याकः मिसा) यात प्रसाद ग्रहण याकेगु परम्परा दु। बुगंद्यः तन्त्रसाधाना नाप स्वागूलि प्रतिमूर्ति तयेगु इतिहास खने मदु।

Categorized in राष्ट्रिय