नेपाल उद्योग वाणिज्य महासङ्घया वरिष्ठ उपाध्यक्ष पदय् अञ्जन श्रेष्ठयात ल्यःगु दु। निगु चरणया चुनाव जुइ न्ह्यः हे सहमति कथं श्रेष्ठ महासङ्घया वरिष्ठ उपाध्यक्ष जुगु दु।

उपाध्यक्षया मेम्ह उम्मेदवार उमेशलाल श्रेष्ठं अञ्जनयात समर्थन याये वं वयकः निर्विरोध जूगु खः। थ्व स्वया न्ह्यः बुधवाः जुगु न्हापागु चुनावय् स्वम्ह प्रतिस्पर्धीमध्ये सुयागु न ५० प्रतिशत मत मवगुलि थौं न्हिनय् २ बजेया लागि निगु चरणया चुनाव यायेगु क्वछिगु खः।

न्हापागु चरणय् त्रिपक्षी प्रतिस्पर्धाय् अञ्जन श्रेष्ठ, उमेशलाल श्रेष्ठ व रामचन्द्र संघईपि खः । न्हापागु चरणय् संघई पिहावने वं अञ्जन व उमेशलाल दथुइ निगु चरणया चुनाव जुइत्यःगु खः।

महासङ्घया विधान कथं वरिष्ठ उपाध्यक्षय् निर्वाचित जूइत ५० प्रतिशत मत माः। महासङ्घया विधान कथं आःयाम्ह वरिष्ठ उपाध्यक्ष चन्द्रप्रसाद ढकाल वइगु कार्यकालया लागि स्वतः अध्यक्ष जुइ।

Categorized in राष्ट्रिय