२०८० चैत्र १६, शुक्रबार

आईपीएल क्रिकेटय् राजस्थानं स्वंगु विकेट त्याकल

राम डंगोल | चौलागा द्धादशी ११४३, बैसाख ४ सोमवाः

इन्डियन प्रिमियर लिग आईपीएल क्रिकेटय् गुजरात टाइटन्सयात बूका राजस्थान रोयल्स विजयी जूगु दु। अहमदाबादय् चान्ह्यः जूगु कासाय् राजस्थान स्वंगु विकेटं विजयी जूगु खः।

गुजरातं बिःगु १ सय ७८ रनया लक्ष्य राजस्थानं १९ ओभर २ बलय् न्ह्यगू विकेटय् पूरा याःगु खः। राजस्थानया लागि कप्तान सञ्जु सामसन व शिमरन हिटमायरं अर्धशतकीय पारी म्हितूगु खः।

सामसनं ६० रन व हिटमायरं ५६ रन देवदत्त पडिकलं २६, ध्रुव जुरें १८ रन दयकूगु खः। गुजरातया लागि मोहम्मद सामीं स्वंगु विकेट, राशिद खानं निगु विकेट, हार्दिक पान्डे व नुर अहमदं छगू छगू विकेट काःगु खः ।

टस बूया न्हापां ब्याटिङ याःगु गुजरातं २० ओभरय् न्ह्यगू विकेटय् १ सय ७७ रन दयकूगु खः।

गुजरातया लागि डेबिड मिलर दकलय् अप्पो ४६ रन, शुभमन गिलं ४५, कप्तान हार्दिक पान्डें २८, अभिनव मनोहरं २७ व साइ सुदर्शनं २० रन दयकूगु खः। राजस्थानया लागि सन्दीप शर्मा निगु विकेट व ट्रेन्ट बोल्ड, एडम जाम्पा व युजभेन्द्र चहलपिन्स छगू छगू विकेट काःगु खः। थुगु कासा लिपा राजस्थानया ८ अङ्क जूगु दु सा गुजरातया ६ अङ्क जूगु दु।

Categorized in कासा