निर्वाचन आयोगं थौं निसे वैशाख १० गते जुइगु स्वंगु थासय् उपनिर्वाचनया लागि प्रचार प्रसार यायेत निषेध याःगु दु।

थौं वैशाख ७ गते चान्ह्यः १२ बजेनिसे वैशाख १० गते मतदान केन्द्र बन्द मजुतले प्रचारप्रसार निषेधया याये मदइगु धका निर्वाचन आयोगया सहायक प्रवक्ता सूर्यप्रसाद अर्यालं धाःगु दु।

उगु इलय् निर्वाचन प्रचारप्रसार लगायत छु न कथंया छलफल, अन्तक्रिया, सभा, सम्मेलन, कार्यशाला, गोष्ठी यायेत निषेध याःगु दु। अथेहे उम्मेदवारया पक्ष वा विपक्षय् छु न प्रकारया प्रचारप्रसार यायेगु, मत फ्वनेगु, एसएमएस, फेसबुक, भाइबरपाखे मत फ्वने दइ मखु।

बारा निर्वाचन क्षेत्र नं २, तनहुँ निर्वाचन क्षेत्र नं १ व चितवन निर्वाचन क्षेत्र नं २ प्रतिनिधिसभा सदस्यया लागि निर्वाचन जुइत्यःगु खः।

Categorized in राष्ट्रिय