कपिलवस्तुइ बौद्ध विहार दयेकीगु जूगु दु । इशापूर्व ४८३ पाखे भगवान बुद्ध दनिगु इलय् हे कपिलवस्तु राज्यया द्वलंद्वः शाक्यतय्त स्याःगु धकाः धयातःगु थाय् सगरहवाय् आः येँयापिं शाक्यतय्सं थः पूर्खायात लुमंकाः बौद्ध विहार दयेकीगु जूगु दु ।

शाक्य महाविहार संघया नायः शुभकाजी शाक्यया नेतृत्वय पदाधिकारीपि वंगु छगू पुचलं लुम्बिनी विकास कोषया उपाध्यक्ष भन्ते मेत्तय व सदस्य सचिव सानुराजा शाक्ययात नापलानाः सगरहवाय् ‘शाक्य स्मृति विहार’ दयेकेगु बारे सहलह याःगु खः । बौद्ध वाङ्मयय् न्ह्यथनातःकथं कोशल राज्यया जुजु विरुद्धकं थःत दासीपुत्र धाःगु तमं कपिलवस्तुइ आक्रमण यानाः राज्य हे ध्वस्त याना बिउगु खः ।

वहे झ्वलय् ज्यान बचे यानाः कपिलवस्तु स्वयां भचा तापाक सगरहवाय् च्वनाच्वंपिं करिब ७७,००० म्ह शाक्यतय्त ज्वनाः आम नरसंहार याःगु खः । अन स्याःपिं शाक्यतय्गु लाश वहे थासय् बाः वइगु खुसिइ वांछ्वया बिउगु खः धइगु नं कथन दु । उगु थासय् थीथी इलय् पुरातात्विक उत्खनन् जूबलय् थीथी कथंया चैत्य व पःखाः आदि थेंज्याःगु संरचनात नं लुया वःगु खः ।

आः अनया ऐतिहासिक पुखू व थाय्यात संरक्षण व विकासया लागि अन चीभाः सहित विहार निर्माण यायेगु इच्छा शाक्य महाविहार संघं प्रकट याःगु खः । उकिया लागिं माःगु जग्गा चूलाका बीत नं संघं इनाप यायेधुंकूगु खँ संघया महासचिव संघरत्न शाक्यं कनादीगु दु ।

Categorized in राष्ट्रिय