इन्डियन प्रिमियर लिग (आईपीएल) क्रिकेटय् मुम्बई इन्डियन्सं राजस्थान रोयल्सयात खुगु विकेटं बूकुगु दु।

वंगु चान्ह्य वाङखडे मैदानय् जूगु कासाय् २ सय १३ रनया लक्ष्य ज्वना ब्याटिङ याःगु मुम्बई न १९ ओभर ३ बलय् ४ विकेट गुमे याना उगु लक्ष्य पूरा याःगु खः। मुम्बईया लागि डेविड ४५ रन व तिलक बर्मा २९ रन अविजित म्हितुगु खः। अथेहे सूर्यकुमार यादव ५५ रन, क्यामरन ग्रीनं ४४ रन दयकूगु खः। राजस्थानया रविचन्द्रन आश्विनं निगु विकेट, ट्रेन्ट बोल्ट व सन्दीप शर्मां छगु छगु विकेट काःगु खः।

टस त्याका न्हापां ब्याटिङ याःगु राजस्थानं निर्धारित २० ओभरय् ७ विकेट गुमेयाना २ सय १२ रन दयकूगु खः। राजस्थानया यशस्वी जैसवालं १ सय २४ रनया शतकीय पारी म्हितूगु खः। मुम्बईया अर्शद खानं स्वंगु विकेट, पीयूष चवालां निगु व जोफ्रा आर्चर, राइली मेरीडिथपिन्स छगु छगु विकेट काःगु खः। थुगु कासा लिपा मुम्बई न प्लेअफया सम्भावना कायमै जूगु दु। मुम्बई च्यागू कासाय् प्यंगु त्याःगु दुु सा अङ्कतालिकाय् न्ह्यगू थासय् दु।

Categorized in राष्ट्रिय