सरकार व आविष्कार केन्द्र दथुइ न्ह्यगू बुँदे सहमति
लहनान्युज | तछलाथ्व एकादशी ११४३, बैसाख १८ सोमवाः
सरकार अनुसन्धान नाप विकास, नवप्रवर्तन व आविष्कारया लागि विकास बजेटय् १ प्रतिशत रकम छुटे यायेगु सहमत जूगु दु।
शुक्रबाःनिसे माइतीघर मण्डलाय् धर्ना च्वनाच्वम्ह राष्ट्रिय आविष्कार केन्द्रया अध्यक्ष महावीर पुन व सरकार दथुइ थौं सोमबाः न्ह्यगु बुँदे सहमति जूगु दु। उपप्रधान नाप रक्षामन्त्री पूर्णबहादुर खड्का व आविष्कार केन्द्रया अध्यक्ष पुनं थौं सोमबाः सहमतिपत्रय् ल्हाःचिं तयादीगु खः।
सहमति कथं अनुसन्धान नाप विकास, नवप्रवर्तन व आविष्कार सम्बन्धी ज्याय् एकीकृत रुपं सञ्चालन यायेत सरकारं कोष स्थापना याइगु जुगु दु। कोषया व्यवस्थापन नाप सञ्चालनया लागि सरकारं ६० दिं दुने विधेयकया मस्यौदा तयार याना संघीय संसदं आः वइगु अधिवेशनं विधेयक पास याइगु जुगु दु।
नाप वइगु आर्थिक वर्ष पुँजीगत (विकास) बजेटय् १ प्रतिशत रकम कोषय् जम्मा यायेगु सहमतिइ उल्लेख याःगु दु । सरकारनाप जूगु सहमतिकथं आविष्कार केन्द्रया अध्यक्ष पुनं वंगु शुक्रबाःनिसे माइतीघर मण्डलाय् च्वना च्वंगु धर्ना न स्थगित याःगु दु।
