नागरिक उन्मुक्ति पार्टीं पत्रकार सम्मेलन यासे लाल आयोगया प्रतिवेदन सार्वजनिक यायेत माग याःगु दु । उगु पत्रकार सम्मेलनय् पार्टीया वरिष्ठ उपाध्यक्ष दामोदर पण्डितं यदि सरकारं लाल आयोगया प्रतिवेदन सार्वजनिक मयात धाःसा ‘नेपाल बन्द’ तकया आन्दोलन यायेगु ख्याच्वः बियादिगु खः ।

टिकापुरय् प्रहरी अधिकारीया हत्या जुइवं प्रशासनं अन कफ्र्यु तयाः स्थानीय थारुतय्गु छेँ च्याकेगु, लुटपाट यायेगु व ज्वनेगु ज्या याःगु खःसा उकिया छानबिन यायेत पुलांम्ह न्यायाधीश गिरिशचन्द लालया नेतृत्वय् आयोग गठन याःगु खः ।

उगु आयोगया प्रतिवेदन धाःसा सरकारं आः तक सार्वजनिक याःगु मदुनि । उपाध्यक्ष पण्डितं जारी याःगु विज्ञप्तिइ धयातःगु दु, ‘यदि लाल आयोगया प्रतिवेदन सरकारं सार्वजनिक मयात धाःसा जिमिगु मेगु विकल्प मदु, जिपिं आन्दोलन यायेत विवश जुइ । जेठ ३, ४ व ५ गते मसाल जुलुस, कोणसभा व ६ गते निसें १० गते तक नेपाल बन्दया घोषणा थुगु हे प्रेस विज्ञप्तिपाखें यानाच्वना ।’

२०७२ सालय् संविधान जारी जुइवं उकिया विरोधय् मधेश व थरुहटय् जूगु आन्दोलनया झ्वलय् सरकारी पक्षपाखें जूगु दमन बारे अध्ययन यायेत सरकारं लालया नेतृत्वय् आयोग दयेकूगु खः । तर उगु आयोगया प्रतिवेदन आः तक सार्वजनिक मयाःगुलिं अनेक न्ह्यसः ब्वलनाच्वंगु दु । चौधरी पक्षं ताः इलंनिसें उगु प्रतिवेदन सार्वजनिक यायेत माग याना वयाच्वंगु खः ।

थ्वहे झ्वलय् जेल सजाय फयाच्वंम्ह रेशम चौधरीं थःत सर्वोच्च अदालतप्रति भरोसा दुगु खँ धयादीगु दु । कैलाली जिल्ला अदालत व उच्च अदालत दिपायलं याःगु फैसला सर्वोच् अदालतं सदर यायेधुंकाः विज्ञप्ति जारी यासें सर्वोच्च न्यायालयप्रति भरोसा दुगुलिं थः अझ नं न्याययात पियाच्वनागु खँ धयादीगु दु ।

सर्वोच्च अदालतया न्यायाधीशपिं आनन्दमोहन भट्टराई व नहकुल सुवेदीया इजलासं चौधरीया जन्मकैद सजाययात सदर याःगु खः ।

सर्वोच्च अदालतया फैसलां थःप्रति न्यायिक मजूसां नं उकियात स्वीकार यायेगु विकल्प मदुगु खँ नं विज्ञप्तिइ धयातःगु दु । उकथं हे थःत अझ नं पुनरावेदनया लँपु चालाच्वंगु दु धासें टिकापुर घटनायात कयाः म्वाःमदुगु खँ दयेकाः लाथेपाथे सामाजिक सञ्जालय् पोष्ट मयायेत नं इनाप यानादीगु दु ।

Categorized in राष्ट्रिय