उत्तर प्रदेशया उपमुख्यमन्त्री ब्रजेश पाठकं पत्रकारिता लोकतन्त्रया प्यंगु थां खः धका धयादीसे “सत्ता व पत्रकारिता मिले जुया लोकतन्त्र बलाक्के माः, अले जक देश व राज्यया उन्नति सम्भव दु,“ धका धयादीगु खः।

प्रेस क्लब अफ आगरा व उत्तर प्रदेश पत्रकार संघया ग्वसालय् सार्क जर्नलिस्ट्स फोरमं ग्वसाः ग्वगु ज्याझ्वः इन्डो–नेपाल–बंगलादेश मिडिया कन्क्लेभ–२०२३ य् उपमुख्यमन्त्रीं भिडियो सन्देशपाखे अथे धयादीगु खः। होटल क्लार्क शिराजय् भारत, नेपाल व बंगलादेशया प्यसःम्ह स्वया अप्पो पत्रकारपिनिगु ब्बति दुगु जुगु उगु ज्याझ्वलय “समसामयिक परिदृष्यय् मिडियाया चुनौती व समाधान“ बिषय गोष्ठी जुगु खः।

ज्याझ्वःया मूपाहाँ केन्द्रीय कानून नाप न्याय राज्यमन्त्री प्रा.एसपी सिंह बघेलं प्रतिस्पर्धा व टीआरपीया कारण गुलि न बुखँ बच्छि अपूर्ण व तथ्यविहीन प्रसारण व प्रकाशन जुयाच्वंगुलि अज्यागु बुखँपाखे गलत असर जुयाच्वंगु धका धयादीगु खः। समाजय् गुकथं गलत पत्रकारिताया लागि म्हासूगु पत्रकारिता शब्द प्रयोग याइ, उकथं हे प्रशासनिक कर्मचारीया भ्रष्टाचारयात ह्यागू शब्द च्वयेगु यानाच्वंगु दु धका धयादीगु खः।

उत्तर प्रदेश राज्यया शिक्षा मन्त्री योगेन्द्र उपाध्यायं सरकार व पत्रकारं समाजया लागि बिचाः यासा जक समस्याया समाधान जुइ धका धयादीगु खः। “पत्रकारपिन्स जनतायात सचेत यायेमाः। संकटकालय् पत्रकारितापिनिगु चेतनाया प्रभाव जिमिसं खनागु दु। अभिव्यक्ति स्वतन्त्रताय् प्रतिबन्ध लग यागु इलय् पत्रपत्रिका न सः थ्वयकलय व विरोध यात। वहे कारणं तत्कालीन सरकार क्वधल। पत्रकारपिन्स बालागु मतिइ ज्या यातकि जक समाज, राज्य व देशय् ह्यूपाः वइ,“धका वयकलं धयादीगु खः।

 

सार्क पत्रकार मञ्चया अध्यक्ष राजु लामां भारत लोकतन्त्रया जननी देय् खः धका धयादगिु खः। “नेपाः व बंगलादेशय् भारतया ग्वाहालि जक लोकतन्त्र वंगु खः। विश्वय् यक्को देशय् न भारतीय पत्रकारितापाखे प्रभावित जु। प्रेरणा कयादीस, जिमिसं थकिइ यक्को सय्केमाःनि, दक्षिण एसियाया पत्रकारपिन्स बिचाः यायेमाः,“ लामां धयादीगु दु। अफगानिस्तानका पत्रकारपिन्स यक्को समस्याया सामना यायेमाःगु दु। दक्षिण एशिया नाप भारतया पत्रकारपि न लोकतन्त्रया रक्षाया लागि न्ह्यने वया ल्वानाच्वंगु दु धका धयादीगु खः।

क्लबया अध्यक्ष अशोक अग्निहोत्री, वरिष्ठ पत्रकार विनोद भारद्वाज, आदर्श नन्दन गुप्ता, जसवीर सिंह जस्सी, शिव चौहान, सञ्जय सिंह, रिंकी तोमर, अजेन्द्र चौहान, अरुण रावत, मनिष जैन, विजय बघेल, समीर कुरेशी, कपिल अग्रवपिन्स न थःपिनिगु खँ तयादीगु खः।

Categorized in अन्तर्राष्ट्रिय