बिद्यासुन्दरं न्ह्याकूगु येँ महानगरय् एम्बुलेन्स सेवा, चर्चा बालेन
लहनान्युज | तछलाथ्व चतुर्थी ११४३, जेठ ९ मंगलवाः
हाकनं छक्वः येँ महानगरपालिकाया मेयर बालेन्द्र शाह चर्चाय् वयाच्वंगु दु । खय्तला येँ मपा प्रमुख बालेन्द्र शाह चर्चाय् मदुगु हे गबले दु धकाः । वय्कः न्ह्याबलें चर्चाय् दु लिसें विवादय् नं । थुगुसी नं स्वनिगलं पिनेया छम्ह मनूया फेसबुक स्टाटसया कारणं मेयर बालेन्द्र शाह चर्चालिसें विवादय् वःगु दु । छखे बालेन्द्र शाहया समर्थकत वय्कःया बांलाःगु ज्या धकाः प्रशंसा यायां लय्तायाच्वंगु दुसा मेखे हल्ला जक यानाः ज्या मयाःसे न्हापायाम्ह मेयरं याःगु दक्वं ज्याया जस काय्त जक स्वयाच्वन धकाः आलोचना नं उतिकं हे जुयाच्वंगु दु ।
थुगुसी बालेन्द्र शाह चर्चाय् वयाच्वंगु विषय धइगु येँ महानगरपालिकां उपलब्ध याकातःगु १०२ नम्बरया एम्बुलेन्स सेवा खः । जुल छु धाय्बलय् कञ्चनपुरं छम्ह नुगःया विरामीयात वासः याकेत येँय् हल । येँय् थ्यंकाः १०२ यात फोन यानाकथं एम्बुलेन्स थ्यंकःवल व इलय् हे अस्पताल थ्यंकाः उपचार न्ह्याकेत अःपुल । थुलि जुइधुंकाः येँ महानगरपालिकाया एम्बुलेन्स सेवा खनाः लय्ताःम्ह सेवाग्राहीं बालेन्द्रयात सुभाय् ब्युसें स्टाटस अपडेट यात । थनं हे हाकनं छक्वः बालेन्द्रया प्रशंसक व आलोचकतय् दथुइ कमेन्ट वार सुरु जुल व प्रशंसा लिसें आलोचनाया नं वर्षा हे जुल ।
येँ मपाया १०२ एम्बुलेन्स सेवा आःजक न्ह्याःगु वा बालेन्द्र शाह निर्वाचित जुइधुंकाः जक निःशुल्क जूगु मखु । थ्व सेवा येँ मपाया निवर्तमान मेयर विद्यासुन्दर शाक्यया पालय् हे सुरु जुइधुंकूगु खः । विश्व महामारीया रुप काःगु कोभिड १९ संक्रमण महामारी नेपालय् नं दुहांवयाः लकडाउन जूगु इलय् हे तत्कालीन येँ मपा मेयर विद्यासुन्दर शाक्यया सक्रियताय् थ्व सेवा न्ह्याकूगु खः । उगु इलय् एम्बुलेन्स धयाकथं मदइगु, अस्पताल वनेत थाकुइगु कथंया अवस्था जूबलय् तत्कालीन मेयर विद्यासुन्दर शाक्यया पहलय् महानगरं हटलाईन सेवा न्ह्याकूगु खः । कोभिड विरामीयात अस्पताल यंकेत एम्बुलेन्स माःसा १०२ व नन कोभिड विरामीयात माःसा ११८० नम्बरया हटलाइन सेवा येँ मपां न्ह्याकूगु खः ।
‘थ्व एम्बुलेन्स सेवा आः तिनि न्ह्याःगु मखु, कोभिडया इलय् येँ महानगरपालिकाबासी जक मखु, स्वनिगः लिसें सम्भव दुथाय् तक्क वासः याकेत अस्पताल वने मफुगु अवस्था खनेदयेधुंकाः जिगु हे नेतृत्वय् निःशुल्क एम्वुलेन्स सेवाया नितिं १०२ नम्बरया हटलाईन सेवा न्ह्याकागु खः । न्हापा धेबा कयावःगु एम्बुलेन्स सेवायात उगु इलय् येँ मपां भुक्तानी बीगु यानाः जनताया नितिं निःशुक्ल दय्कागु खः’ येँ मपाया निवर्तमान मेयर शाक्यं धयादिल ।
कोभिड अथवा नन कोभिड विरामीयात अस्पतालं छेँ व छेँय् नं अस्पताल वनेत निःशुल्क सेवा बीगु सर्तय् नेपाल एम्वुलेन्स सेवायात दँय् १ करोड ४४ लाख बीगु कथं न्यादँया लागिं सम्झौता यानाः तत्कालीन मेयर विद्यासुन्दर शाक्यं एम्वुलेन्स सेवा न्ह्याकादीगु खः । निःशुल्क एम्वुलेन्स वापत येँ महानगरपालिकां नेपाल एम्वुलेन्स सेवायात दँय् १ करोड ४४ लाखया दरं उगु इलंनिसें हे भुक्तानी यानावःगु दु ।
आः वयाः सामाजिक सञ्जाल व छुंसञ्चार माध्यमं बालेन शाहं हे थ्व सेवा न्ह्याकूगु कथं सुचं छ्वयाच्वंगु दु । थुकी बालेन्द्र शाहया समर्थकतय्सं तकं नं च्यूताः प्वंकाच्वंगु दु । छपुचः ला बालेन्द्र शाहया बांलाःगु ज्या धकाः प्रचार यानाच्वंगु द हे दु । थुगु खँय् बालेन्द्र शाहया हे समर्थकतय्सं तकं मेपिन्सं यानाथकूगु ज्या नं बालेन्द्रं याःगु धकाः प्रचार यानाः बालेन्द्र शाहयात बदनाम याय्त स्वःगु, बालेन्द्रया स्वच्छ छवि स्यंकेत स्वःगु धकाः धयाच्वंगु दु ।
‘मनूतय्सं निःशुल्क एम्वुलेन्स सेवा काय्खनेमा धइगु सोचं जिं सेवा न्ह्याकाथकागु खः । महानगरं निःशुल्क एम्वुलेन्स सेवा बियाच्वंगु दु धइगु सन्देश वंगु दु, व महत्वपूर्ण खँ खः । जस सुनां काल धकाः यक्व हालाच्वनेम्वाः, इतिहास थः हे साक्षी दु’ विद्यासुन्दरया धापू दु ।
बांलाःगु ज्या यानावन धाःसा अथें हे प्रशंसकत अप्वयावनी । इतिहासयात स्यंकाः थःगु नां दय्के थन आवश्यक हे मदु । अप्वः प्रशंसा वा अप्वः चर्चां झन स्थिती मेकथंया जुइफु धइगु खँय् समर्थकत नं सचेत जुइमाःगु खनेदु । व हे एम्बुलेन्स सेवाया खँय् छम्हेसिगु नां वःसा वाह वाह याय्गु अले मेपिनिगु नां वःसा निर्वाचित जुयावनेधुंकाः मयाःसे गाःला धाय्गु कथंया ज्या मतदातातय्सं नं याय्मज्यू । थ्व खँ निगुलिं पक्षयात लागू जू, चाहे बालेन्द्रया समर्थक खय्मा, अथवा विद्यासुन्दरया ।
Categorized in राष्ट्रिय
