२०८० चैत्र १५, बिहिबार

झी छाय् थःथः हे जक विवाद यानाच्वना ?

काजी रत्न | तछलाथ्व षष्ठी ११४३, जेठ ११ बिहीवाः

धाधां थुगुसीया बुंगद्यःया रथयात्रा नं क्वचाइगु जुल । बुंगद्यःया रथ जाह्वलाख्यलय् थ्यनेधुंकल आः भोटो जात्रा नं जुइ अले थुगुसीया जात्रा नं क्वचाइ । थुलिया दथुइ यक्व हे घटनाक्रम, चर्चा परिचर्चां थाय् काल । दकले न्हापां ला बुंगद्यःया रथया हे खुब चर्चा जुल ।
 
धाय्गु खःसा थुगुसी धात्थें हे बुंगद्यःया रथ ग्यानापुसे हे खनेदुगु खः । अप्वः यानाः नुगःयाः धुंकाः रथ भचा अप्वः धेचूगु खनेदइगु खः तर, थुगुसी ला पूच्वं जात्रा न्ह्यासांनिसें हे रथ बांमलाक्क हे धेचूगु खः । रथ धेचूगु हुनिं हे न्हापांगु दिनय् गाःबहाःयाः न्याय्माःगु, न्याय् मफुत । नःत्वालय् हे रथ थात । तर न्ह्यागु जूसां रथ सालीपिनिगु प्राविधिक ज्ञान व क्षमतायात प्रशंसा याय् हे माः । थुगुसीया रथयात्रा बांलाक हे क्वचाल । 
 
थ्व छगू चर्चाया विषय जुल । मेगु चर्चाया नं विषय दु । छिं अनुमान यानादीधुंकल । खः, याकः मिसाया खँ । किपुलिइ याकःमिसा लिसें बुंगद्यःया प्रतिमूर्ति स्थापना जुइवं थुकिं तःधंगु विवादया रुप काल । छगू खँ, याकः मिसा छम्ह जिवीत देवीया रुपं किपुलिइ दयाच्वंगुलिइ जिवीत देवीया प्रतिमूर्ति दय्केमज्यूगु खँ । थुकिं जीवित परम्पराय् ध्वय्फुगु तर्क पानेजुलिसें आपालं संस्कृतिह्यमितय्सं तल ।
 
मेगु खँ, बुंगद्यः व याकः मिसा दछिइ छकः जक नापलाइगु मान्यता कथं पानेजुपिं यलया इतिंनिसें लाकां तकं मन्ह्याःसे किपुलिइ याकः मिसायाथाय् बुंगद्यःया स्वां छाःवनेगु परम्परा । बुंगद्यःयात हे किपुलिइ स्थापना याय्धुंकाः आः बुंगद्यः व याकः मिसा दछिइ छकः जक नापलाइगु मखय्धुंकल, न्हिं न्हिं नापं हे दय्धुंकल । थ्व अवस्थाय् उकथं स्वां छाःवनेगुया औचित्य मन्त धकाः पानेजुपिन्सं स्वां छाःमवनेगु अडान तल । 
 
खतुं आः थ्व विषय ज्यनेधुंकल । पानेजुपिं किपुलिइ वनाः याकः मिसायात बुंगद्यःया स्वां छाया नं वय्धुंकल । तर थुकिं सकल नेवाःतय् न्हाय् भुइल धाःसां पाइमखु । गबलें बुंगद्यःया रथयात्रा हे अलमलया स्थिती, गबलें याः मन्यात, ख्वपय् यंकी धइगु विवाद । गबलें छु गबलें छु । बुंगद्यःया रथयात्रा दँय्दसं विवादय् लानावःगु झी नेवाःतय् नितिं मछालापुस्से च्वंगु खँ खः । झी माःगु खँय् गुलि न्ववाना व थःगु हे न्हाय् ध्यनेगु खँय् गुलि न्ववाना, व छकः दुवाले लिबाय्धुंकल । दँय्दसं थःगु हे न्हाय् झीसं ध्यनाच्वनागु झीसं चाःला मचाःला ?
 
बुंगद्यःया नित्य पूजानिसें माःगु पर्व पूजा आदि न्ह्याकेत राज्यं गुलि तिबः बियाच्वंगु दु ? किपुलिइ याकः मिसायात राज्यपाखें छु सुविधा दु ? बियाच्वंगु सुविधा गाः कि मगाः ? परम्पराया निरन्तरताया नितिं छु गुकथंया दुरगामी योजना दु ? थज्याःगु तसकं महत्वपूर्ण विषय झीसं गबलें ल्ह्वना ला ? संस्कृतिया हे परम्पराया लागिं झीसं गुथि विधेयक विरुद्धया प्रदर्शनय् क्यनागु शक्ति हाकनं क्यनेगु बिचाः यानाला ? मयाना, याना सा बस् झी थःथः हे विवाद याना, झी थः थः हे ल्वाना ।