२०८१ आषाढ ३१, सोमबार

पशुपतिइ जलहरी लुँ खः कि मखु धइगु न्ह्यसलं प्रतिनिधिसभाया बैठक स्थगित

लहनान्युज | तछलाथ्व सप्तमी ११४३, जेठ १२ शुक्रवाः

पशुपति द्यःया गजूलय् जलहरी लुँया खः कि सिजःया खः धइगु न्ह्यसः संसदय् थौं वःगु दु।

जेठ १० गते प्रतिनिधिसभाया बैठकय् नीति तथा कार्यक्रमया छलफलय् ब्बतिइ कायेगु झ्वलय् सत्तारुढ दल नेकपा माओवादी केन्द्रया सांसद लेखनाथ दाहालं तत्कालीन प्रधानमन्त्री केपी शर्मा ओलीया इलय् अनेकन भ्रष्टाचार जूगु धका द्धपः बिःगु खः।

दाहालं धाःगु दु, ‘वयकः (केपी शर्मा ओली) सरकारया इलय् गुलि न भ्रष्टाचारया काण्ड वःल ? गुलि, ओम्नी, वाइडबडी, स्वास्थ्य सामाग्रीइ निगु अर्बया भ्रष्टाचार। थुलि जक मखु, पशुपतिइ जलहरी तःगु इलय् लुँ तयेगु धका सिजः तया भ्रष्टाचार थे यक्को भ्रष्टाचारया काण्ड दु।’ सत्तारुढ दलया सांसदं पशुपतिइ लुँ धका सिजःयो जलहरी तःगु द्धपः बिःगु धासे प्रमुख प्रतिपक्षी नेकपा एमाले न थौं शुक्रवाः प्रतिनिधिसभाया बैठकय् न्ह्यसः तःगु खः।

थुगु विषयया सत्य तथ्य न्ह्यने महतले संसद न्ह्याके बिइमखु धका एमाले न अडान तःगु कारण शुक्रवाःया प्रतिनिधिसभा बैठक हे प्रभावित जूगु दु। एमालेया अवरोधलिपा सभामुख देवराज घिमिरे न बैठक हे स्थगित याःगु खः।

Categorized in राष्ट्रिय