गुजरात टाइटन्स इन्डियन प्रिमियर लिग आईपीएल क्रिकेटया फाइनलय् थ्यःगु दु।

अहमदावादय् म्हिगः चान्ह्य जूगु कासाय् मुम्बई इन्डियन्सयात ६२ रनं बूका गुजरात फाइनलय् थ्यःगु खः।

गुजरातं बिःगु २ सय ३४ रनया विशाल लक्ष्य मुम्बई १० बल ल्यः दुगु इलय् १ सय ७१ रन दयेका अलआउट जूगु खः। मुम्बईया सूर्यकुमार यादवं ६१, तिलक वर्मां ४३ व क्यामरन ग्रिनं ३० रन दयकुगु खः। गुजरातया मोहित शर्मां न्यागु विकेट व मोहम्मद शामी, राशिद खानपिन्स निगु निगु विकेट काःगु खः।

न्हापां ब्याटिङ याःगु गुजरातं शुभमन गिलं १ सय २९ रन दयकूगु खः। थुगु सिजनया आईपीएलय् थ्व वयागु स्वंगूगु शतक खः। गिलं आईपीएलय् छगू हे सिजनय् स्वंगू शतक दयकूपि विराट कोहली व जोस बट्लरया रेकर्ड न बराबरी याःगु दु। गुजरातं आः उपाधिया लागि कन्ह्यः चेन्नई सुपर किंग्स नाप म्हितिइगु जुगु दु।

वंगु दँय् न्हापागु पटक आईपीएल म्हितूगु गुजरातं न्हापागु दँय् हे उपाधि त्याकूगु खः।

Categorized in कासा