प्रधानमन्त्री पुष्पकमल दाहाल प्रचण्डया भारत भ्रमणया औपचारिक घोषणा जूगु दु।

नेपाःया परराष्ट्र मन्त्रालय व भारतया विदेश मन्त्रालयं छक्वलं प्रधानमन्त्री प्रचण्डया थ्व हे वइगु जेष्ठ १७ निसे २० तक जुइत्यःगु भ्रमणया औपचारिक तिथि घोषणा जूगु दु। भारतीय समकक्षी नरेन्द्र मोदीया मैत्रीपूर्ण निमन्त्रणाय् जुइत्यःगु प्रधानमन्त्री प्रचण्डया प्यन्हु यकं भ्रमणया झ्वलय् भारतीय राष्ट्रपति द्रौपदी मुर्मु व उपराष्ट्रपति जगदीप धनखरनाप शिष्ट्राचार भेट जुइगु ज्याझ्वः दु।

प्रधानमन्त्री प्रचण्ड नेतृत्वय् भ्रमण टोली स्वकीय सचिव गंगा दाहाल, नेपाल सरकारया मन्त्री, सचिव व वरिष्ठ अधिकारी सहभागी जुइगु धका परराष्ट्र मन्त्रालयं धाःगु दु । भ्रमणया निन्हु कुन्हु जेष्ठ १८ गते प्रधानमन्त्री प्रचण्ड व भारतीय समकक्षी नरेन्द्र मोदी दथुइ हैदरावाद हाउसय् प्रतिनिधिमण्डल स्तरीय वार्ता जुइ।

वार्ता लिपा निम्हं प्रधानमन्त्रीपिन्स मंकाः कथं पत्रकार सम्मेलन याइ। उगु हे दिं मोदीं प्रधानमन्त्री प्रचण्ड व वयागु प्रतिनिधिमण्डलया सम्मानय् दिवाभ्वँय् याइगु ज्याझ्वः दु। अथेहे, प्रधानमन्त्रीया भ्रमणय् स्वन्हु कुन्हु जेष्ठ १९ गते भारतया मध्य प्रदेशय् उज्जैन व इन्दोरया न भ्रमण ज्याझ्वः दु।

नेपाःया प्रधानमन्त्रीया रुपय् प्रचण्डयागु थ्व प्यक्वःगु भारत भ्रमण खः।

Categorized in राष्ट्रिय