ऐतिहासिक, सांस्कृतिक वस्ती ख्वनाय् वंगु म्हिगः आइतवाः छगू तःजिगु देय् भ्वय्या ज्याझ्वः जूगु दु।

ख्वनाया ऐतिहासिक व सांस्कृतिक रुद्रायणी देवीया देवगणय् दुहां वःपिं न्हूपिं च्याम्ह देवगणया लसकुस व सम्मानय् उगु देय् भ्वय् जूगु खः । रुद्रायणी देवीया देवगणय् ताःई न्ह्यवंनिसें प्वनाच्वंगु च्याम्ह गणया रुपय् न्हूपिं ल्याय्म्हत दुहां वःगु लसताय् ख्वनाय् उत्सव हनेकथं उगु देय् भ्वय् न्यायेकूगु खः ।

ज्याझ्वलय् झायादीम्ह उपप्रधानमन्त्री लिसें गृहमन्त्री नारायणकाजी श्रेष्ठं संस्कार, संस्कृति, पहिचानया संरक्षणय् सक्रिय जुयादीपिं देवगणयात थुकथंया औपचारिकताय् जक सीमित जुइगु सम्मान मयासे प्रोत्साहन नं बीमाःगु व उकिया निंतिं विशेष व्यवस्था यायेमाः धयादिल ।आधुनिकीकरणय् वनेगु पहिचान त्वःताः यान्त्रिकीकरणया नक्कल यायेगु मखु धासें उपप्रधानमन्त्री श्रेष्ठं आधुनिकताया नामय् भद्दा जुइक नक्कल यायेगु प्रवृत्ति अप्वयाच्वंगु खँय् सचेत जुइमाः धयादिल ।

थनया रुद्रायणी द्यःया गंप्याखनय् ४६ म्ह दइ । थुपिं पीखुम्ह देवगण मदयेकं प्याखं पूवंकेगु ला छु संचालन तकं याये फइगु सम्भावना मदु । रुद्रायणी गंप्याखनय् दुहां वःपिं १८ दँनिसें ४८ दँ दुपिं आर्यन महर्जन, नारायण महर्जन, देवलाल महर्जन, गोविन्द महर्जन, किशोर महर्जन, केशराम महर्जन, दिवाकर महर्जन, बुद्धिरत्न डंगोल खः । वय्कःपिं सकलें गंप्याखनय् दुहां वःगु लसताय् वय्कःपिनिगु हे सम्मानय् वंगु आइतवाः देय् भ्वय्या ग्वसाः ग्वःगु खः ।

यल महानगरपालिका वडा नं. २१ या संयोजनय् देवगणया सम्मान व धार्मिक विधिकथं सगं बीगु ज्याझ्वःलिसें देय् भ्वय्या ग्वसाः ग्वःगु खः । मुक्कं ख्वनामित हे जानाः ग्वसाः ग्वयाः व्यवस्थापन याःगु देय् भ्वजय् न्हय्द्वःयात भ्वय् नकूगु खः ।

पुलांम्ह मन्त्रीलिसें नेकपा माओवादी केन्द्रया नेत्री पम्फा भुसालं ख्वना देय्यात सांस्कृतिक पर्यटकीय क्षेत्रया रुपय् विकास यानाः समुन्नत व समृद्ध ख्वनाया रुपय् न्ह्यःने यंकेगु स्वयेमाः धयादिल । वय्कलं बहुचर्चित फास्ट ट्रायकया योजना ख्वनाया मौलिक वस्तीयात लिच्वः मलाइकथं न्ह्यःने यंकेमाः धयादिल ।

ज्याझ्वःया सभापतिलिसें २१ वडाअध्यक्ष रविन्द्र महर्जनं द्यःगंया निंतिं च्याम्ह थप जूसां अझं मेपिं स्वम्ह देवगणया व्यवस्थापन याये ल्यं दुगु जानकारी बियादिल ।

Categorized in राष्ट्रिय