नवदुर्गा जात्राय् विवादय् सहमति
लहनान्युज | तछलागा दशमी ११४३, जेठ ३० मंगलवाः
नेवाः समुदायया म्हसीका धयागु मूर्त, अमूर्त सम्पदा खः । नेवाःया मूर्त अमूर्त सम्पदां नेवाः समुदाययात जक मखु, समग्र विश्वय् नेपाःयात म्हसीकाच्वंगु दु । अय्जूगुलिं नेवाःतय्सं थःगु मूर्त अमूर्त सम्पदायात थःगु गौरव नं ताय्काच्वनी । तर थ्व हे गौरव इलय्ब्यलय् विवादया विषय जुयाः सतहलय् थहांवयाबी।
थुगुसीया नवदुर्गा जात्रा नं अथे हे जुल । ख्वपया नवदुर्गा जात्राया लिपांगु दिं भलभलाष्टमीया दिं, शनिबाः ख्वपया नवदुर्गा द्यःछेँय् हाम्रो जात्राया संचारकर्मी श्याम था व नवदुर्गा द्यःगणपिनि दथुइ विवाद जूगु जक मखु, ल्हाः तय्गु तकंया स्थिती वलसा थुगु वालय् थ्व विषयं तःधंगु चर्चाया थाय् नं काल । यक्वसिनं द्यःगणपिन्सं पत्रकारयात ल्हाः तल धइगु खँय् आपत्ती नं प्वंकलसा द्यःगणपिन्सं तःक्वःमछि धयां मज्यूबलय् सामान्य घ्वाय्माःगु स्थिती वःगु धासें थःगु बचाउ यात । थ्व विषयं सामाजिक संजाललिसें संचारमाध्यमय् तःधंगु चर्चा काय्धुंकाः आः धाःसा निगुलिं पक्ष दथुइ थःथःगु गलती स्वीकार याना धासें सहमति जूगु दु ।
संचारकर्मी था व द्यःगण दथुइ नेवाः पत्रकार राष्ट्रिय पत्रकार दबू ख्वप शाखा व समाजया प्रतिनिधितय् रोहबरय् सहमति जूगु खः । सहमति धुनाकथं मंकाः प्रेश विज्ञप्ती जारी यासें लिपा लिपा भक्तजन व संचारकःमिया लागिं व्यवस्थित रुपं व्यवस्था याय्गु योजनालिसें न्ह्याःवनेगु प्रतिवद्धता निगुलिं पक्षं प्वंकूगु दु । विज्ञप्तीइ निगुलिं पक्षं थःथःगु गल्ती महसूस यानाः सहमति यानागु धयातःगु दु। निगुलिं पक्ष दथुइ थःथःगु जिम्मेवारी बहन याय्गु झ्वलय् भीडय् ठेलमठेल जूगु अवस्थाय् सामान्य चोट लाःगु धयातःगु दु। ‘वइगु दिनय् थज्याःगु घटना हाकनं जुइकेमबीगु व जात्रायात भब्यसभ्य तरीकां हनाः हलिंन्यंक बृहत रुपं प्रचार प्रसार यानावनेगु प्रतिवद्धता तकं जाहेर यानागु दु’ विज्ञप्तीइ च्वयातःगु दु । सहमति पत्रय् हाम्रा जात्राया संचालक श्याम व द्यःगणपाखें श्री नवदुर्गा देवगण जात्रा तथा मन्दिर व्यवस्थापन समितिया सचिव लक्ष्मी प्रसाद बनमालां हस्ताक्षर याःगु दु। समितिपाखें सल्लाहकार नारायणमान बनमाला व श्याम थायापाखें नेवाः पत्रकार राष्ट्रिय दबू ख्वप शाखाया सचिव देबेन्द्र प्रजापति साक्षी च्वनाः हस्ताक्षर याःगु दु ।
सहमति जुल, थ्व बांलाःगु खँ धाय्माः तर, थज्याःगु परिस्थिती ब्व हे मलंगु खःसा झन बांलाःगु खः । नेवाः संचारकर्मी, पत्रकारत आर्थिक ल्याखं स्वयां नं थःगु समुदायया म्हसीका न्ह्यब्वय्गु ल्याखं ज्या यानाच्वंगु दइ । विशेष यानाः पत्रकार श्याम थाया हे खँ ल्हाय्गु खःसां वय्कः चान्हि मधाःसे नेवाः जात्रापर्वया लाइभ याय्गु नितिं जुयाच्वनी । छुं आर्थिक लाभ स्वयां थःगु जात्रापर्व, संस्कृतिया प्रचारया नितिं थः उकथं जुयाच्वनागु थाया धापू दु। अज्याःगु अवस्थाय् द्यःगणपिन्सं ल्हाः हे तय्माःगु अपाय्सकं छु अवस्था वल धइगु न्ह्यसः थन दंगु दु ।
थुगु घटना धुंकाः यक्वसिनं सामाजिक संजालमार्फत व थीथी संघसंस्थां प्रेस विज्ञप्तीमार्फत घटनाया भत्सर्ना याःगु दु । द्यःगणपिन्सं उकथं ल्हाः वाःगु खँयात कयाः आपाःसिनं आलोचना याःगु खः। थुकियात कयाः नवदुर्गा द्यःगणपाखें तःक्वःमछि धयां नं संचारकर्मी श्याम थां खँ मन्यंगु व वय्कलं नं द्यःगणपिन्त हे ल्हाः तकं तःगु तर व धाःसा भिडियोलय् रेकर्ड मजूगु खँ धाःगु दु। उलिमछि मनूत दुथाय् ल्वापुया स्थिती खनेदयाकथं सुनां न सुनां अनं भिडियो का हे काय्माःगु खः। श्याम थायात ल्हाः तःगु भिडियो सुनां काय्फुसा वय्कलं ल्हाः तःगु भिडियो सुनां नं छाय् मकाःसे च्वनी धयागु न्ह्यसः पक्कां दनी। लिसें नवदुर्गा द्यःगणपिन्सं जात्राया झ्वलय् लँजुवाःतय्त लँ पनाः जबरजस्ती धेबा काय्गु याःगु व अप्वः धेबा मबिलकि दुव्र्यवहार याइगु खँ न्हापा नं पिमदंगु मखु। ख्वपय् नवदुर्गा द्यःगणपिन्सं अनुशासन व संयमता पालना मयाःगु खँ न्हापा पिमदंगु मखु। थ्व खँय् सरोकारवाला पुचलं ध्यान बीमाःगु खनेदु ।
ख्वपया जक खँ मखु, थज्याःगु जात्रापर्वय् संचारकर्मी, रिपोर्टरतय्सं दुव्र्यबहार फय्माःगु थ्व न्हापांगु मखु। थ्व हे घटनालिसे स्वानाः संचारकर्मी बिराजकाजी राजोपाध्यायं १२ दँ न्ह्यः पचली भैरवया खड्गसिद्धि जात्राया झ्वलय् सीजा ह्वलीकुन्हु थःत दुव्र्यबहार जूगु खँ सामाजिक संजालय् च्वयादीगु दु। जात्रापर्वय् संचारकर्मीतय्त रिपोर्टिङया नितिं छुं व्यवस्थापन मयाइगु, हुलमुलय् घ्वात्तुघ्वाकाः रिपोर्टिङ याय्त बाध्य जुइगु अवस्थाय् थज्याःगु घटना जुया हे च्वंगु दु। मिडिया कभरेज व रिपोर्टिङयात प्रभावकारी दय्केत उकिया व्यवस्थापनपाखे नं सरोकारवाला पक्षं ध्यान बीगु याःसा थज्याःगु घटना हाकनं मजुइगु खः ।
Categorized in राष्ट्रिय
