भगवान गौतम बुद्धया जन्मभुमि लुम्बिनि जःखः लाःगु सगरहवाय् शाक्य संहार स्मृति विहार दय्केगु आज्जुयात कयाः छगू अन्तरक्रिया ज्याझ्वः जूगु दु ।

शाक्य महाविहार संघया ग्वसालय् ज्याझ्वः जूगु खः । ज्याझ्वलय् लुम्बिनि विकास कोषया उपाध्यक्ष भिक्षु मैत्तेय भन्तें सगरहवाय् शाक्य स्मृति विहार दय्केगु ग्वसाः बांलाःगु व उकी थःम्हेसिनं नं ग्वहालि याय्गु प्रतिबद्धता प्वंकादिल ।

उगु थासय् म्ह्वतिं दच्छिया छकः जूसां शाक्य परिवारं पुजा याय्गु व भ्रमण यानाच्वनेमाःगु बिचाः भन्तें तयादिल ।उगु हे ज्याझ्वलय् संघया नायः शुभकाजी शाक्यया जन्कोया लसता कथं वय्कःयात हंगु नं खः । लिसें मदुम्ह ध्रुवरत्न शाक्यं निस्वनादीगु ध्रुवतारा सम्मान येँ देय्या दकले थकालिम्ह आजु चक्रेश्वर मोहनरत्न बज्राचार्ययात देछागु खः ।

अन्तरक्रिया ज्याझ्वलय् संघया न्वकु अमीरमान शाक्यं शाक्य वंशया गौरवया खँ कनादिलसा मूछ्यान्जे संघरत्न शाक्यं सगरहवाय् शाक्य स्मृति विहार दय्केमाःगु आवश्यकताबारे न्ववानादिल ।

ज्याझ्वलय् संघया दुजः आनन्दरत्न शाक्य, येँ महानगरपालिकाया पूर्व मेयर विद्या सुन्दर शाक्य व बागमति प्रदेशया सांसद शैलेन्द्र बज्राचार्यलिसें नं थःथःगु नुगःखँ तयादीगु खः ।

Categorized in राष्ट्रिय