ग्रेटर नेपालया नक्सा व नेपाःमिया भ्वाभःगु राष्ट्रवाद
काजीरत्न | तछलागा एकादशी ११४३, जेठ ३१ बुधवाः
झीथाय् नेपालय् ज्या स्वयां चर्चा अप्वः जुइयः । अले ज्या याइपिं स्वयां चर्चा याइपिं न्ह्यःने लानाच्वंगु नं झीसं हे खनाच्वनागु दु । थौंकन्हय् नं यक्व विषय चर्चाय् दु । प्रधानमन्त्रीया मुर्रा म्येय्या चर्चा, श्याम था व नवदुर्गा द्यःगणया ल्वापुया चर्चा, बालेनया कार्यकक्षय् ग्रेटर नेपालया नक्साया चर्चा । दक्वं खँ ल्हानाच्वनां ला लाइमखु । थौं बालेनया कार्यकक्षय् ग्रेटर नेपालया नक्साया हे खँ ल्हाय् का ।
सामाजिक संजालय् येँ महानगरपालिकाया मेयर बालेनया कार्यकक्षय् ग्रेटर नेपालया फोटो तल धकाः किपा छपाः सार्वजनिक जुल । मूलधारया संचार माध्यमय् समाचार व चर्चाया विषय नं जुल । गुलिसिनं बालेनया सच्चा देशभक्तया रुपय् चित्रण याय् तकं लात । थुलिया दथुइ थौं तकं व ग्रेटर नेपालया फोटो दुगु कार्यकक्षय् बालेन थः हे फ्यतुनाच्वंगु किपा धाःसा सार्वजनिक जूगु मदुनि । बालेनया कार्यकक्षय् ग्रेटर नेपालया किपा यख्खानातःगु स्वयावया धाःपिं प्रत्यक्षदर्शी छम्ह हे पिहांवःगु मदुनि । वल सा मात्र सामाजिक संजालय् चर्चा जक ।
आः थ्व ग्रेटर नेपालया किपा यख्खाःगु हे खःसां थन निगू स्वंगू न्ह्यसः दंगु दु । गुकियात स्वाभाविक नं ताय्केमाः । भारतं अखण्ड भारतया नक्सा सार्वजनिक यात धकाः नेपालीत आक्रोशित जुल । वयां लिपा प्रचण्डया भारत भ्रमण नं जुल । प्रचण्डया भारत भ्रमणया झ्वलय् जूगु मंकाः प्रेस सम्मेलनय् भारतीय प्रधानमन्त्री नरेन्द्र मोदीं न्हापांगु खुसी सीमा विवादया बारे सार्वजनिक रुपं अभिव्यक्ति नं बिल । सीमा विवाद ज्यंगु ला मखुनि तर सीमा विवाद ज्यंकेत पहल याय्गु अभिव्यक्तियात आःया परिस्थितीइ सकारात्मक रुपं काय्माः ।
थ्व धुंकाः धाःसा बालेनया ग्रेटर नेपालया नक्सा सार्वजनिक जुल । भारतं अखण्ड भारतया नक्सा सार्वजनिक यानाकथं नं बालेनं नक्सा तल धइगु खँ मवः । नकि प्रधानमन्त्री भारत भ्रमणय् वनेधुंकाः । वल सा भारतीय प्रधानमन्त्रीं सीमा विवादया बारे सार्वजनिक अभिव्यक्ति बी धुंकाः । थुलि ई तक्क बालेन छाय् पियाच्वंगु ले ? भारतं अखण्ड भारतया नक्सा सार्वजनिक यानाकथं बालेनं ग्रेटर नेपालया नक्सा छाय् मतःगु ?
वयां लिपा मेगु न्ह्यसः धइगु, चुच्चे नक्सा ला मन्त्रिपरिषदं भारी बहुमतलिसें पारित जूगु खः तर ग्रेटर नेपालया नक्सा नेपालय् गन, छु निकाय, अङ्गपाखें प्रमाणित खः ले सा ? आः भारतं अखण्ड भारतया नक्सा तय्गु वा नेपालं ग्रेटर नेपालया नक्सा तय्गुलिइ तात्विक भिन्नता छु ले ? आः थःपिन्सं ग्रेटर नेपालया नक्सा तय्गु ठिक धाय्गु सा भारतया ज्या गलत धाय्गु गुकथं ले ? अनं नागरिकताया खँ नं वइ ।
थौंया दिनय् जनकपुर, विराटनगरया बासिन्दायात ला छ्यंगूया रंगया हे कारणं नेपालीतय्सं नेपाली धयाच्वंगु मदु धाःसा ग्रेटर नेपाल नक्सा कथंया भूभाग नेपालय् वल धाःसा उमित व भूभागया बासिन्दायात झीसं नेपाली नाली ला ? मनू मयः, भूमि जक यः धाय्थें मजूला थ्व विषय ?
थ्व दक्वंया दथुइ, मेगु महत्वपूर्ण न्ह्यसः ला थ्व हे खः, बालेनया कार्यकक्षय् ग्रेटर नेपालया किपा यख्खायातःगु स्वयावःम्ह प्रत्यक्षदर्शी सुं दु ला ?
