विद्युतीय सवारीयात प्रोत्साहन बीगु धयाच्वँच्वं यात्रीया उत्पादन दित
काजीरत्न | तछलागा द्धादशी ११४३, जेठ ३२ बिहीवाः
यात्री । छितः छु लुमनावल थ्व धयाकथं । गनं यात्रा वनाबलय् थः यात्री जुयागु लुमनावल कि ? सुं यात्री नापलाःगु लुमनावल कि ? यात्री धयाकथं छुं यात्रा यानाच्वंम्ह व्यक्ति खः । अय्जुयाः यात्री धयाकथं थःगु वा मेपिनिगु छुं यात्रा प्रसङ्ग लुमनीगु स्वाभाविक हे धाय्माल । तर आः यात्री धयाकथं नेपालीतय्सं मेगु हे प्रसङ्ग लुमंकीगु परिस्थिती जूगु दु । यात्रा लुमनीबलय् अप्वः यानाः न्ह्यइपूगु, बांलाःगु खँ लुमनीगु खः तर यात्री धाय्बलय् बांमलाःगु खँ लुमनीगु स्थिती जूगु दु । लिपा छु जुइ मस्यू, तर कम से कम आःयात नि बांलाःगु खँ धाःसा पक्कां लुमनीमखु ।
आः यात्री धालकि नेपालय् उत्पादन जुयाः बांलाःगु बजाः कयावनाच्वंगु विद्युतीय मोटरसाइकल यात्री व थुकिया उत्पादन बन्द जूगु खँ लुमनी । उत्पादनया अनुमति कयाः, मोटरसाइकल दय्केत माःगु च्यासिस निर्माणया अनुमति कयाः यात्रीं नेपालय् हे विद्युतीय मोटरसाइकलया उत्पादन न्ह्याकूगु खः । थुकिं बांलाःगु बजार नं कयावनाच्वंगु खः । स्वय्बलय् थुकिया लुक्स नं आकर्षक हे खनेदु । ल्याय्म्हतय्त यइगु स्पोर्टी लुक्स दुगु यात्री मोटरसाइकल नेपालया हे उत्पादन धाय्बलय् न्ह्याम्ह नेपाःमिया न्हाय् तपु जुइफ । तर थीथी प्राविधिक कारणं यात्रीया उत्पादन दित । दक्वं जुयाः नं सवारी दर्ताया प्राविधिक समस्या ज्यंकाः नेपालय् विद्युतीय सवारीया उत्पादनयात प्रोत्साहित याय्गुपाखे सरकारं ध्यान मब्यूबलय् यात्री मोटरसाइकलया उत्पादन दित ।
उपभोक्ता मोटरसाइकल न्यात अले सडकय् ब्वाकल । यात्री सडकय् ब्वाकूबलय् ट्राफिक प्रहरीं थुकिया नम्बर प्लेट ग्व धकाः सवारी चालकयात ज्वन । नम्बर प्लेट तय्त दकले न्हापां नम्बर माल । नम्बर काय्त मोटरसाइकल दर्ता याय्माल । मोटरसाइकल दर्ता याय्त यातायात व्यवस्था विभागं थीथी प्राविधिक समस्या क्यनाः दर्ता हे यानामबिल । अनुमति कयाः नेपालय् उत्पादन जूगु नेपाली ब्राण्डया मोटरसाइकल दर्ता याय्त कार्यविधि हे मदु । गज्याःगु बिडम्बना ?
थुगु इलय् ला सरकारं विद्युतीय सवारीयात प्रोत्साहित याय्गु खँ ल्हानाच्वंगु खः । तर व्यवहारय् स्वल धाःसा अज्याःगु छुं हे खनेमदु । न त पिनं दुहांवःगु विद्युतीय सवारी उपभोक्तायात न्याय् अःपुइगु वातावरण दय्केगु स्वःगु दु न त नेपालय् विद्युतीय सवारी उत्पादनयात प्रोत्साहित याय्त स्वःगु दु । आयात अप्वयाच्वंगु इलय् पिनं वःगु सवारी न्याय्त सहज दय्केगुपाखे ला मस्वल, म्वाःल धाय्का । कम से कम नेपाली उत्पादनयात ला प्रोत्साहित याय्त स्वय्माःगु खः नि । थुकिं पिनं वःगु सवारी न्याय्मालीगु परिस्थिती नं जुइमखु । पिनं हय्माःगु इन्धन नं जाय्काच्वनेमाली मखूगु । तर झीके थज्याःगु छुं हे परिस्थिती मदु । दु सा मात्र बिडम्बना । नेपाली उत्पादन बन्द जुल ।
