विशेष जुल नेपाःया ५० औँ ओडिआई
प्रजित शाक्य | तछलागा द्धादशी ११४३, जेठ ३२ बिहीवाः
वंगु लाय् नेपाली क्रिकेट टिमं चमत्कार यासें विश्वकप छनोटया ग्लोबल चयनय् थ्यनेगु व एकदिवसीय मान्यता ल्यंकेगु आज्जु पूवंकल। नेपाल क्रिकेट टिम आः एसिया कपय् म्हितेगु मेगु आज्जु पूवंकेत आः एसिसी मिजं प्रिमियर कप म्हिताच्वंगु दु । प्रिमियर कप म्हितीगु टिम एसिया कपया लागिं योग्य जुइगु प्रावधान दु। झिगू राष्ट्रया ब्वति दुगु थुगु धेंधें बल्लाखय् नेपालयात हे उपाधिया मू दावेदारया रुपं काःगु दु । थुगु धेंधें बल्लाखय् च्याम्पियन जुइधुंकाः नेपालं एसिया कपय् भारत व पाकिस्तानविरुद्ध म्हिती। गुगु नेपाली क्रिकेटया लागिं इतिहासया हे तःधंगु कासा जुइ।
थ्व लेख तयार यानाबलय्तक्क नेपाल निगुलिं कासा त्याकाः सेमिफाइनल सतिक नं थ्यनेधुंकूगु दु। थुगु लेखय् नेपालं ओमानविरुद्ध म्हितूगु विशेष कासाया चर्चा याये । गुगु कासा नेपालया ५०गूगु एकदिवसीय अन्तर्राष्ट्रिय (ओडिआइ) कासा खः।
व कासाय् नेपालं कायम याःगु कीर्तिमानः
सन्दीपया विश्व कीर्तिमान
विश्व कीर्तिमान कायम याःपिं नेपाली कासामि नगण्य हे धाःसां ज्यू। लेग स्पीनर सन्दीप लामिछाने व दुर्लभ कासामिइ लाःगु दु। ओमानविरुद्ध अन्तर्राष्ट्रिय एकदिवसीय क्रिकेट (ओडिआइ) य् दकले याकनं सच्छि विकेट कयाः विश्व क्रिकेटय् थःगु जक मखु, नेपालया हे सम्मान थकयाबिल। सन्दीपं ४२ कासाय् सच्छि ओडिआइ विकेट काःगु खः। थ्वयां न्ह्यः, दकले याकनं सच्छि विकेटया कीर्तिमान अफगानिस्तानया लेग स्पीनर रसिद खान (४४ कासाय् १०० विकेट) या नामय् दुगु खः।
क्रिकेटय् सच्छि विकेटयात कोशेढुङ्गाया रुपं काइ। वंगु लाय् आइसिसी विश्वकप क्रिकेट लिग श्रृङ्खलाय् हे सन्दीपं थ्व कोशेढुङ्गा थीगु अनुमान याःगु खः। तर सन्दीप ९९ विकेटय् थात। वयां लिपा नेपाल व सन्दीपं ओमानविरुद्धया कासायात पियाच्वंगु खः, दकले याकनं सच्छि विकेटया कोशेढुङ्गा थीत। सन्दीपं ओमानविरुद्ध न्हापांगु ओभरया स्वंगूगु बलय् हे आदिल सफिकयात एलबीडब्ल्यूया धरापय् लानाः थःगु प्रतीक्षायात क्वचाय्कल। सन्दीप सच्छि ओडिआइ विकेट काःम्ह नेपालया न्हापांम्ह बलर नं जूगु दु।
सन् २०१८, अगस्ट १य् नेदरल्यान्ड्सया स्टेफन माइवर्गयात आउट यानाः थःगु न्हापांगु ओडिआइ विकेट काःगु खः, गुगु नेपालया हे न्हापांगु ओडिआई कासा नं खः। वयां लिपा सन्दीप नेपालया प्रमुख बलरया रुपय् दयाच्वंगु दु। सन्दीपं स्वक्वः न्यागू वा व स्वयां अप्वः विकेट काःगु दु। पपुआन्युगिनीविरुद्ध ११ खर्च यानाः खुगू विकेट नेपालया हे सर्वश्रेष्ठ ओडिआइ बलिङ प्रदर्शन खः।
सन् २०१६य् जूगु यु १९ विश्वकप क्रिकेट धेंधें बल्लाखय् निम्हम्ह सर्वाधिक विकेटकर्ता जुइधुंकाः सन्दीप विश्व क्रिकेटया मिखाय् लाःगु खः। व इलय् एसोसिएट राष्ट्र नेपालया बलरया व कीर्तिमान छुं चमत्कार स्वयां कम मजू। बङ्गलादेशय् सम्पन्न यु–१९ विश्वकप क्रिकेटय् वय्कलं १४ विकेट काःगु खः। व कासा लिपा वय्कःयात महान् लेग स्पीनर शेन वार्नलिसे लनेगु याःगु खः । व धुंकाः सन्दीप विश्वया प्राय दक्वं फ्रेञ्चाई लिगय् म्हिताः विश्व चर्चित जुल।
दकले अप्वः ओडिआइ स्कोर
त्रिवि क्रिकेट मैदानय् ओमानविरुद्ध न्हापां ब्याटिङ याःगु नेपालं २८ बलया सामना याय्धुंकाः जक रनया खाता चाय्कूगु खः। व इलय्तक्क नेपालया निम्हं प्रारम्भिक ब्याट्सम्यान आसिफ शेख (०) व कुशल भुर्तेल (०)या विकेट डाउन जुइधुंकूगु खः। अज्याःगु दयनीय सुरुआतं नेपालं थ्वयां न्ह्यःया ओडिआईलय् उच्च स्कोर (पपुवा न्युगिनीविरुद्ध २९७) यात त्वाःथली धकाः शायद हे सुनां बिचाः यात खइ।
तर किशोर उमेर नं पूमवंनिम्ह अलराउन्डर कुशल मल्लया शतक, मेम्ह अलराउन्डर सोमपाल कामीया अर्धशतकं नेपाल कीर्तिमान स्कोरतक्क थ्यन। नेपालं निर्धारीत ५० ओभरय् च्यागू विकेटया क्षतिइ ३१० रन दय्कल। थ्व अन्तर्राष्ट्रिय एकदिवसीय क्रिकेटय् नेपालया दकले तःधंगु स्कोर जूगु दु।
कुशलया नेपालया लागिं तेज शतक
नेपालया ५०गूगु ओडिआइ कासा कुशलया शतकं नं ताःईक्क हे लुमंकीतिनि। व कासाय् १९ दँया ब्याट्सम्यन कुशल मल्लं ५९ बलय् शतक दय्कल। व नं नेपालया लागिं दकले तेज शतकया कीर्तिमान जुल । कुशलया २१गूगु ओभरय् ७२ रनय् प्रमुख प्यम्ह ब्याट्सम्यान आउट जुइधुंकाः कुशलं ६४ बलय् १०८ रन जादुं जाःगु पालि खः। कुशलं ओमानया बलरतय्त निर्मम ढङ्गं नक्काः गुंगू चौका झिगू छक्का थ्वात । कुशलं शतक याय्गु झ्वलय् छक्का प्रहार याःगु खः । कुशलं सन् २०२२य् रोहितं पपुआ न्युगिनीविरुद्ध ९१ बलय् सच्छि रन दय्काः कायम याःगु तेज शतकया कीर्तिमान अःपुक हे त्वाःथःगु खः।
कुशल नेपालया लागि ओडिआइ शतक दय्कूम्ह खुम्हम्ह ब्याट्सम्यान खः। थ्वयां न्ह्यः, पारस खड्का, रोहित, दिपेन्द्रसिंह, कुशल भुर्तेल व आसिफ शेखं नं शतक थ्वाःगु दु। कुशलया नामय् म्ह्वः उमेरय् ओडिआइ अर्धशतक थ्वाःम्ह ब्याट्सम्यानया विश्व कीर्तिमान नं दु। वय्कलं प्यदँ न्ह्यः अमेरिकाविरुद्ध ५० रन दय्काः कीर्तिमान तःगु खः । व इलय् वय्कः १५दँ व ३४०न्हु दुम्ह खः। कुशलं थःगु न्हापांगु एकदिवसीय अन्तर्राष्ट्रिय पदार्पण कासाय् विश्व कीर्तिमान अर्धशतक दय्कूगु खः।
