नेपालभाषाया नांजाःम्ह साहित्यकार श्रीलक्ष्मी श्रेष्ठं क्यानाडाया टोरन्टो विश्वविद्यालय धर्म अध्ययन विभागया ग्वसालय् जूगु छगू ज्याझ्वलय् वयकलं ‘कोरोनाया किचलय्’ वाचन यायेगु ज्या जुगु दु।

विभागया थःगु हे कक्षय् जूगु उगु ज्याझ्वलय् साहित्यकार श्रेष्ठं थःगु लिपांगु उपन्यासया स्वंगू अध्याय वाचन यानादीगु खः। विभागया ग्वसालय् बाःछियंकं जूगु ‘गृष्मकालीन नेवाः भाय् प्रशिक्षण’ ज्याझ्वलय् सहभागि प्रशिक्षार्थीतय्त लक्षित यानाः उपन्यास वाचन ज्याझ्वः याःगु खः।

प्रशिक्षार्थीतय्त लक्षित यानाः प्रत्यक्ष व अनलाइनया माध्यमं जूगु उपन्यास वाचन नेपालभाषालिसें अंगे्रजी भासं नं वाचन याःगु खः। वयकलं थःगु उपन्यास वाचनलिपा सहभागितय् जिज्ञासा व न्ह्यसःया लिसः बियादिसें साहित्यकार श्रेष्ठं थम्हं न्हापा बाखं, चिबाखं व चिनाखँ जक च्वयेगु यानाच्वनागु व उपन्यास च्वयेगु इच्छा दुसां पूवंके मफयाच्वंगु खँ कनादिसें सकसिगुं पे्ररणा, हःपाः तिबलं हे कोरोना थेंज्याःगु महामारी न्यनाच्वंगु इलय् प्यलाया दुने उपन्यास पूवंकागु खँ कनादिल ।

विभागया प्रमुख प्रा. डा. क्रिस्टोफ एमरिकं सकसितं लसकुस यानादिसें नेपालभाषाया उपन्यास वाचन याके खंगुलिं लसता प्वंकादिल । लिसें वय्कलं उपन्यास समग्र रुपय् सशक्त जूगु विचाः तयादिसें वाचन यानादीगुलिं च्वमि श्रेष्ठप्रति आभार नं प्वंकादिल। उगु इलय् विभागीय प्रमुख एमरिकं सहभागितय् जिज्ञासा व लिसःयात अनुवाद नं यानादीगु खः ।

विदेशय् च्वनाः नं थःगु देय्या लकस, समसामयिकता, नेवाः कला, संस्कृति, थाय्बाय्या विशेषतायात कःघानाः उपन्यास च्वयादीगुलिं सहभागितय्सं सुभाय् देछासे याकनं मेगु कृति पिथने फयेमा धकाः भिंतुना नं बियादीगु खः।

उगु ज्याझ्वलय् साहित्यकारलिसें मानवशास्त्री डा. बालगोपाल श्रेष्ठ, टोरन्टो विश्वविद्यालयय् नेवाः बौद्ध धर्मया बारे विद्यावारिधी याना च्वनादीम्ह इयान टर्नर, डा. अलाना सौजा लगायतया उपस्थिति दुगु खः ।

Categorized in राष्ट्रिय