भारतीय फिल्म आदिपुरुषय् बालेनया स्वन्हुया अल्टिमेटम
लहनान्युज | दिल्लाथ्व द्धितीया ११४३, असार ५ मंगलवाः
नेपालन्यंकया स्थानीय तहया प्रमुखमध्ये दकले चर्चाय् दयाच्वनीम्ह मेयर सु धकाः न्यंसा छगू हे लिसः वइ, ‘बालेन्द्र शाह।’ प्रशंसाय् जुइमा वा आलोचनाय्, थौंकन्हय् छुं न छुं विषययात येँ महानगरपालिकाया मेयर बालेन्द्र शाहया चर्चा न्ह्याबलें हे जुयाच्वनी। थौंकन्हय् नं वय्कःया खुब चर्चा जुयाच्वंगु दु। थुगु पालय् ला वय्कःया कट्टर आलोचकतय्सं तकं वय्कःयात हे सपोर्ट यानाच्वंगु अवस्था दु। हिन्दि संकिपा ‘आदिपुरुष’ य् सीताया जन्म भारतय् जूगु धइगु डायलग भारतय् नं लिकाय्माःगु माग यासें येँ महानगर दुनेया सिनेमा हलय् हिन्दि संकिपाया क्यनेज्या बन्द याकेवं बालेनया थुगु पलाखय् यक्वसिनं सपोर्ट क्यनाच्वंगु दु।
दक्षिण भारतीय फिल्म आदिपुरुषय् सीताया जन्म सम्वन्धि व डायलग लिकाय्त बालेन्द्रं सुरुइ स्वन्हुया अल्टिमेटम ब्यूगु खः। स्वन्हुतक नं उगु ज्या मजूसा येँ महानगर दुनेया सिनेमा हलय् हिन्दि संकिपाया क्यनेज्या बन्द याकेगु चेतावनि वय्कलं ब्यूगु खः। नेपालय् ला सेन्सर बोर्डं उगु डायलग लिकाय्के बिल। तर भारतय् उगु डायलग मलिकाःगु जक मसखें, आदिपुरुषया सम्वाद च्वमि मनोज मुन्ताशिर शुक्लां सन् १९०३ न्ह्यः नेपाल भारतया हे प्रान्त जुयाच्वंगु व वयां लिपा जक स्वतन्त्र जूगु धकाः सार्वजनिक रुपं अभिव्यक्ति बीवं येँ महानगरपालिकां सोमबाःनिसें महानगर दुनेया हलय् हिन्दी फिल्मया क्यनेज्या दिकेत धाःगु खः।
थ्व विषयस मेयर साहं सामाजिक सञ्जालय् च्वयादीगु दु, “भारतीय संकिपा आदिपुरुषय् दुथ्याःगु जानकी भारतीय म्ह्याय् खः धइगु आपत्तिजनक हसना उगु संकिपाया मूल भागं लिकाय्त जिमिसं स्वन्हु न्ह्यः आह्वान यानागु खः। नेपालया स्वतन्त्रता, स्वाधीनता व स्वाभिमानयात अक्षुण्ण तयाः राष्ट्रहितया रक्षा याय्गु प्रत्येक सरकार, सरकारी निकाय, गैरसरकारी क्षेत्र व नेपाली नागरिकया न्हापांगु कर्तव्य खः धइगु खँय् छुं हे सन्देह मदु।” येँ महानगर क्षेत्र दुने जक उगु संकिपा क्यनेज्या निषेध यानाः देय्या मेगु क्षेत्र वा विदेशय् क्यनेबीगु खःसा उकिं भ्रामक तथ्य स्थापित याइगु जूगुलिं संकिपां उगु आपत्तिजनक अंश चीके हे माःगु व अथे मयाःतल्ले येँ महानगर दुने छुं हे भारतीय चलचित्र क्यनेत सोमबाःनिसें निषेध यानागु येँ महानगर प्रमुख साहं धयादीगु दु।
येँ महानगर प्रमुख शाहया थुगु पलाःयात हे लिनाः पोखरा महानगरपालिकां नं पोखरा महानगर दुने भारतीय संकिपा क्यनेज्याय् रोक तःगु दु। आदिपुरुष संकिपा नेपालय् जक मखु, भारतय् तकं विवादित जूगु दु। उकी हनुमान लगायत थीथी धार्मिक पात्रया संवाद शैली, ग्राफिक्स, पात्रतय् प्रस्तुति आदियात कयाः भारतय् तकंआदिपुरुषया तःधंगु विरोध जुयाच्वंगु दु। नेपाल व भारतय् थ्व विरोधयात कयाः थीथी टीकाटीप्पणी नं जुयाच्वंगु दु।
गुलि विरोधया सः तच्वयाच्वंगु दु, उलि हे संकिपाया दर्शक ल्याः अप्वयाच्वंगु दु। नेपालय् नं स्वन्हु, प्यन्हुया दुने थुगु संकिपां आपालं व्यापार याय्धुंकल सा भारतय् ला झन थुगु संकिपाया व्यापारं आःतक्कया रेकर्ड हे ब्रेक याइगु खःला धइगु चर्चा नं जुयाच्वंगु दु। व ल्याखं थ्व धात्थेंया विरोध खः कि पब्लिसिटी स्टन्ट जक खः धइगु खँ नं दनाच्वंगु दु।
विशेष यानाः नेपालया खँ ल्हाय्बलय् धाःसा बालेन्द्रया पलाःयात कयाः व्यापक समर्थन लिसें शंकाया परिस्थिती नं खनेदु। गुलिसिनं ततःधंगु काण्डयात किचलय् लाकेत थ्व न्हूगु विवाद पितहःगु धइगु खँ नं पिहांवःगु दु। भुटानी शरणार्थी काण्डं जनताया ध्यान चीकेत राष्ट्रवादया थ्व खोल पुइकूगु धकाः गुलिसिनं टीप्पणी याःगु दु।
छखें स्वय्बलय् सीतायात भारतीय मूलयाम्ह धकाः क्यनेगु ज्या भारतपाखें थ्व न्हापांगु खुसी जूगु मखु। तर न्हापा गबलें थुकथंया चर्चा, विरोध जूगु मदु। आः वयाः थुकिं तःधंगु इश्यु जूगु दु। खतुं बालेनं न्ववाःगु हरेक विषयवस्तु तःधंगु इश्यु जुयाच्वंगु दु। छगू इलय् रामया जन्म नेपालया थोरीइ जूगु धकाः तत्कालीन प्रधानमन्त्री केपी ओलीं न्ववाःगु खः। केपी ओलीं रामया जन्म नेपालय् जूगु धाय्गु व भारतं सीताया जन्म भारतय् जूगु धाय्गुलिइ तात्विक भिन्नता छु खः धइगु न्ह्यसः नं दंगु दु ।
उकिया नापं रामया जन्मया खँ थौंकन्हय् गन तन धकाः न्यनेमाःगु नं अवस्था दु। गुकथं रामया जन्मया खँ तनावन, उकथं सीताया जन्मया खँ नं तनावनीगु सम्भावना मदुगु मखु । सीताया जन्मया खँ मनाः मबूगु, छुयां मक्वःगु विषयवस्तु जक जुयाच्वंगु व थुकिं मेगु ततःधंगु विषयवस्तुं जनताया ध्यान चीकेत भ्रमित याःगु धइगु खँ नं पूवंक अस्वीकार य्फइगु अवस्था नं खनेमदु।
