संस्कृति, सम्पदा व पर्यटन प्रर्बद्धन बिषय अन्तरक्रिया क्वचाल
लहनान्युज | दिल्लाथ्व एकादशी ११४३, असार १४ बिहीवाः
नेवाः पत्रकार राष्ट्रिय दबू प्रशिक्षण बिभागया ग्वसालय् व यल महनागरपालिका १६ वडाया ग्वाहालिं संस्कृति, सम्पदा व पर्यटन प्रर्बद्धनय् संचारया भुमिकाया बिषय छगु अन्तरक्रिया जूगु दु।
उगु अन्तरक्रिया ज्याझ्वलय् नेपाल आदीवासी जनजाति पत्रकार महासंघया न्वकु अमर ध्वज लामा, संस्कृतिविद जितेन्द्र बज्राचार्य व दबूया वरिष्ठ न्वकु सुनिल महर्जनपिसं प्रशिक्षण बियादिगु खः।
ज्याझ्वलय् मूपाहाँ कथं यल महानगरपालिका १६ वडा अध्यक्ष निर्मल रत्न शाक्य झायादीगु खः। पत्रकार दबूया नायः नृपेन्द्रलाल श्रेष्ठया सभाध्यक्षताय् उगु ज्याझ्वलय् मूपाहा शाक्य प्रशिक्षकपिन्त सुभाय् पौ लःल्हानादीगु खः।
उगु ज्याझ्वलय् दबूया संस्थापक नायः श्रीकृष्ण महर्जनं संस्कृति व सम्पदा यायेगु निति पत्रकार दबूपाखे न ग्वाहालि याना वयाच्वगु दु धका धयादीगु खः।
उगु ज्याझ्वलय् प्रशिक्षण बिभागया प्रमुख सुनिल महर्जनं पत्रकार दबूपाखे यलय् निगु दँशकनिसे बन्द जुया च्वंगु पाःया जात्रा दबूया ग्वाहालि हाकन निरन्तर न्ह्याकेत ताःलागु खँ न्ह्यथनादिगु खः।
