साफ च्याम्पियन्सीप २०२३ः असफल यात्राय् नं मजू आलोचना
प्रजित शाक्य | दिल्लागा द्धितीया ११४३, असार २० बुधवाः
अन्तर्राष्ट्रिय फुटबलय् नेपाली टीमयात उच्चकोटीइ ल्याःखाय्गु मयाः । यद्यपि साफ फुटबल च्याम्पियनसिपय् नेपाल न्ह्याबलें बल्लाःम्ह प्रतिस्पर्धी जुयावःगु दु । नेपालयात न्ह्याबलें उपाधि दावेदारमध्ये छम्ह नालेगु याः । माल्दिभ्सय् जूगु लिपांगु संस्करणय् नेपाल न्हापांगु खुसी च्याम्पियन जुइगु ईया न्ह्यःने थ्यंगु खः । तर भारतलिसे बुइधुंकाः नेपालया साफ च्याम्पियन जुइगु म्हगस चुंदन । अथेसां व इलय् नेपालया फाइनल प्रवेश नं न्हापांगु हे खः । तर भारतया बेंगलोरय् आः जुयाच्वंगु १४क्वःगु संस्करणया साफ च्याम्यिन्सपय् नेपाल उपाधि मखु, सेमिफाइनल थ्यनीगु टिमया रुपं तकं मकाः । नेपाली समर्थकतय्सं नं खास हे थःगु टिमपाखें अपेक्षा मतः । थौं (मङ्गलबार) साफ च्याम्पियन्सीपया फाइनल कासा भारत व कुवेत दथुइ जुइत्यंगु दु । गुगु फाइनल नेपाली कासामितय्सं छेँय् हे च्वनाः टेलिभिजनय् स्वइ । छाय्धाःसा सकसिनं अपेक्षा याःकथं नेपाल समूह चरणं विदा जुयाः छेँय् लिहांवःगु खः ।
नेपालया थुगुसी छाय् क्वन्ह्याःगु खन ले सा ? थुकिया छुं कारण नं दु । दकले न्हापां ला नेपाली राष्ट्रिय टिम आः रुपान्तरणया स्थितिइ दु । राष्ट्रिय टिमय् लाःपिं दर्शन गुरुङ, सन्तोष तामाङ, सुजल श्रेष्ठलिसें छगू दर्जन स्वयां अप्वः कासामिया विदेश पलायनं प्रशिक्षक भिन्सेन्जो अलवर्टो एनिसयात न्हूपिं कासामि मालेमाःगु समस्या वल । लिपांगु साफय् म्हितूबलय् टिमय् लाःम्ह कप्तान किरण लिम्बुलिसें दीप कार्की, विशाल श्रेष्ठ, रोहित चन्द, अनन्त तामाङ, पुजन उपरकोटी, अन्जन विष्ट, आयुष घलान, मनिष डाँगी, नवयुग श्रेष्ठ जक टिमय् दुगु खः । एरिक विष्ट, नविन लामा, आवास लामिछाने व आशिष चौधरी, सनिश श्रेष्ठ, मणिकुमार लामा, दिपकराज सिंह ठकुरी, लकेन लिम्बु, विमल पाण्डे व सिमान्त थापाया थ्व न्हापांगु साफ खः ।
अथे हे, साफ च्याम्पियन्सीपया तयारी नं थुगुसी खास हे बांलाः मजू । अखिल नेपाल फुटबल संघं (एन्फां) राष्ट्रिय टिमया लागिं कासामितय्त सःतूसां क्लबं कासामि रिलिज याय्त माने मजुइधुंकाः बन्द प्रशिक्षण निन्हु जक जूगु खः । व धुंकाः फिलिपिन्सलिसेया मैत्री कासाय् नं नेपाल १–० गोलं बुत । यद्यपि नेपाली टिमं व कासाय् ठिकठाक म्हितूगु खः । अथे हे, साफ च्याम्पियन्सीपय् थुगुसी कुवेत व लेवनान थुज्वःगु बल्लाःगु देय्यात आमन्त्रित टिमया रुपं साफय् दुथ्याकूगु दु । फिफा वरीयताय् लेवनान ९९ व कुवेत १४३गूगु थासय् लाः । वमध्ये कुवेत नेपालया हे पुचः ‘ए’ लय् लात । गुगु पुचलय् साविक त्याकामि भारतलिसें पाकिस्तान नं दुगु खः । कुवेत व
भारत दुगु पुचलं सेमिफाइनलय् थ्यनेगु धइगु नँया बजि न्ह्यय् थें खः । भारत दकले अप्वः च्याक्वः च्याम्पियन जुइधुंकूम्ह नं खः ।
नेपालं कुवेतविरुद्ध म्हिताः धेंधें बल्लाःयात न्ह्याकल । नेपाल अपेक्षा कथं हे कुवेतलिसे ३–१ गोलं बुत । नेपालया कुवेतविरुद्ध झिगू कासाय् थ्व गुंगूगु हार खm । छगू कासा ज्वलिंज्वलय् क्वचाःगु खः । व कासाय् कुवेतया लागिं खलिद हजिया, सबायब अलखल्दी व मोहम्मद अब्दुल्लां गोल यात । नेपालया लागिं अञ्जन विष्टं याःगु गोलं हःपाः बिल । यद्यपि अञ्जन व कासाय् गोल यानाः नेपालया लागिं दकले अप्वः गोलया कीर्तिमान लिक्क थ्यन । कासाया ६८गूगु मिनेटय् खालिद हाजियाया हेड पास गलत जूबलय् बल काःम्ह अञ्जनं कुवेतया गोलरक्षक अब्दुल रहमानलिसेया वन भर्सेज वनय् उत्कृष्ट गोल याःगु खः । नेपालया लागिं ५४ कासा म्हितूम्ह अञ्जनया अन्तर्राष्ट्रिय गोल ल्याः १२ थ्यंगु दु । वय्कः नेपालया लागिं दकले अप्वः गोल याःम्ह हरि खड्का व निराजन रायमाझी स्वयां आः १ गोलं जक ल्यूने लाःनि । वय्कः निम्हेनिसं ज्वलिंज्वः १३–१३ गोल याःगु दु । कुवेतविरुद्ध म्हिताः नेपालया सेन्टर ब्याक अनन्त तामाङं अन्तर्राष्ट्रिय कासाया ल्याः ५०गू थ्यंकल ।
कुवेतलिसे बुइधुंकाः साफ च्याम्पियन्सीप २०२३ या ल्यज्या चरण पार याय्त नेपालयात घरेलु टिम भारतविरुद्धया कासा बुइगु छुट मदुगु खः । अथेसां भारतलिसे नं २–० गोलं बुइधुंकाः नेपाल पुचः चरणय् पाकिस्तानलिसे म्हिते न्ह्यः हे धेंधें बल्लाखं विदा जुल । सुनील क्षेत्री व नोयरेम महेस सिंहया गोलं नेपाल निराश जुइमाल । नेपालं न्हापांगु हाफय् अनपेक्षित कासा म्हिताः भारतयात दबाबय् तःगु खः । न्हापांगु हाफय् म्हितूगु बांलाःगु कासा मन्ध्यान्तर धुंकाः निरन्तर याय्मफुबलय् नेपालयात थः अनुकुल लिच्वः मवल । पूर्वाद्र्धय् तुलनात्मकरुपं नेपालं यक्व गोल याय्गु ह्वःताः दय्कूगु खः । व कासाय् कीर्तिमान गोलपाखे न्ह्यज्यानाच्वंम्ह स्ट्राइकर अञ्जन विष्ट घाःपाः जुयाः मैदानं पिहांवनेधुंकाः नेपालया लय स्यंगु खः । व धुंकाः अञ्जनं पाकिस्तानविरुद्ध नं म्हितेमफुत । भारतविरुद्ध म्हिताः सीमान्त थापां अन्तर्राष्ट्रिय फुटबलय् पदार्पण यात । साफ च्याम्पियन्सीपया लागिं प्रशिक्षक एनिसं सीमान्तलिसें विमल पाण्डे व लकेन लिम्बुयात टिमय् दुथ्याकादीगु खः । साफया तयारीइ फिलिपिन्सलिसेया मैत्री कासाय् लकेन व विमलं पदार्पण याःसां सीमान्तं थ्व उपलब्धिया लागिं छुं ई पीमाल ।
लिपांगु कासा न्ह्यः हे थःगु हाथ्या क्वचाःगुलिं पाकिस्तानविरुद्धया कासा नेपालया लागिं प्रतिष्ठाया कासा जुल । पाकिस्तानविरुद्धया कासा छुं अर्थय् विशेष नं जुल । खय्तला निगू देय् दथुइया अन्तर्राष्ट्रिय कासा अथें नं विशेष जुइ । साफ च्याम्पियन्सीपय् नेपालं १५ दँ न्ह्यःनिसें पाकिस्तानयात बुके मफुनिगु खः । पाकिस्तानयात बुकाः नेपाल साफ च्याम्पियन्सीपया पुचः चरणय् स्वंगू कासाय् हारया बांमलाःगु रेकर्डं नं हिपांवय्त स्वयाच्वंगु खः । नेपाल जक मखु, पाकिस्तान नं धेंधें बल्लाखं पिहांवनेधुंकूगु खः । अय्जुयाः पाकिस्तानयात नं नेपालविरुद्धया कासा प्रतिष्ठा ल्यंकेगु कासा जूगु खः । गुकी नेपाल त्यात व नेपाल हःपाः जित ल्हातय् लाकाः छ्यं धस्वाकाः छेँय् लिहांवल । स्थानापन्न कासामि आसिस चौधरीया गोल निर्णायक जुइधुंकाः नेपालं पाकिस्तानयात १–० गोलं बुकाः हःपाः जित ल्हातय् लाकूगु खः । कासाया ८०गूगु मिनेटय् आसिसं गोल याःगु खः । व हे गोलं कासाया जितहार क्वःछिनाबिल ।
नच्चागु उमेरया आसिसया थ्व न्हापांगु अन्तर्राष्ट्रिय गोल खः । वय्कः जक थःगु प्यंगूगु अन्तर्राष्ट्रिय कसााय् गोल याय्त ताःलाःगु खः । नेपालया प्रशिक्षक एनिसं घाःपाः जूम्ह स्ट्राइकर अञ्जन विष्टया थासय् आभाष लामिछानेयात न्हापांगु ल्यज्याय् म्हितकादीगु खः । तर आभाषया कासा सन्तोषजनक मजूबलय् प्रशिक्षक एनिसं मध्यान्तर धुंकाः वय्कःया थासय् आसिसयात मैदानय् क्वकाल । आसिसं निर्णायक गोल यानाः प्रशिक्षकया विश्वासयात पाय्छि सावित नं यात । प्रशिक्षक भिन्सेन्जों नं आसिसया प्रशंसा यासें जक १८दँया स्ट्राइकर आसिसया ताःहाकःगु अन्तर्राष्ट्रिय फुटबल क्यारियर जुइ धयादिल । ‘लिपांगु निदँ स्वदँय् नेपालया लागिं जूगु गोलमध्ये करीब ५० प्रतिशत अञ्जनया नामय् दु । जितः ताः, आसिस नं व हे क्षमताया स्ट्राइकर खः । नेपाली टिमय् वय्कः थुज्वःम्ह फरवार्ड मालाच्वंगु दु’ इटालियाली प्रशिक्षक एनिसया धापू दु । आसिसया गोलं नेपाल सन् २००८ लिपा साफ च्याम्पियन्सीपय् पाकिस्तानयात बुकेत ताःलाःगु खः । थ्व लिच्वःलिसें नेपाल निगू हार व छगू जितलिसें पुचः ए दुने स्वंगूगु थासय् च्वनाः छेँय् लिहांवल ।
थुगुसी पुचः चरणं विदा जूसां नेपाल फुटबल टिमया आलोचना मजू । खय्तला, म्ह्वः तयारीइ नेपालया ल्याय्म्ह टिमं भारतय् म्हितूगु कासा लुधनेबहःजू । नेपालं स्वंगू कासाय् बांमलाक मम्हितू । कुवेतविरुद्धया कासाय् पूर्वाद्र्धय् निगू गोल नय्धुंकाः नेपालं मध्यान्तर धुंकाः शानदार पुनरागमन याःगु खः । कुवेतविरुद्ध नेपालं स्वंगुलिं थःगु हे गल्तीं नःगु खः । भारतविरुद्ध पूर्वाद्र्धया कासा बांलातसा निगूगु हाफय् लय स्यन । पाकिस्तानविरुद्ध ला त्याकल हे । अय्जुयाः अनुकुल लिच्वः मवःसां नियमित कासामित विदेश वंगु व टिम रुपान्तरणया स्थितिइ लानां नं नेपालं साफ च्याम्पियन्सीपय् लुधबहःगु कासा म्हितल धाय्माः ।
