धर्मकीर्ति विहारया सीघःया प्रमुख श्रद्धेय अनागारिका धम्मावति गुरुमांया प्रतिमूर्ति दयेकाः पिथनीगु जूगु दु।

वसपोल प्रमुख जुयाच्वनाबिज्याःगु धर्मकीर्ति विहारं वसपोलया धम्मावति गुरुमांया प्रतिमूर्ति दयेकाः पिथनेत्यंगु खः । वंगु गुरुपुन्हि कुन्हु ९० दँय् क्यनाबिज्याःम्ह शासनधज धम्माचरिय अग्गमहागन्थवाचक पण्डित भाषा थुवाः श्रद्धेय अनागारिका धम्मावति गुरुमांया बुन्हिया लसताय् वसपोलाय प्रतिमूर्ति पिथनेत्यंगु खः ।

नेपाःया थेरवाद बुद्ध शासनिक ख्यलय् ज्वःमदुगु योगदान बियाबिज्याःम्ह वसपोलया ९० दँ बुन्हिया लसताय् वंगु छुं दिं न्ह्यः जक नागरिकस्तरं हनेज्या याःगु खः ।

अथे हे वसपोलया ९० दँ बुन्हिया हे लसताय् थेरवाद, महायान व वज्रयान भिक्षु लामा गुरुपिंपाखें धर्मकीर्ति विहारय् छवाःयंकं अभिधम्म पाठ याःगु खः। अथेहे झ्वलय् वंगु सोमवाः सीघःस्थित श्रीघः ज्ञानमाला भजन खलकं नं वसपोलयात हनेज्या याःगु खः ।

सीघःया चैत्य परिक्रमा याकाः हनापौ देछासे हनेज्या याःगु ज्याझ्वलय् भजन खलःपाखें ज्ञानमाला भजन नं न्ह्यब्वःगु खः।

Categorized in राष्ट्रिय