२०८१ आषाढ १२, बुधबार

बरामद जूगु लुँ काण्डय् खुम्हेसित ज्वनं

लहनान्युज | अनलाथ्व तृतीया ११४३, साउन ४ बिहीवाः

त्रिभुवन अन्तर्राष्ट्रिय विमानस्थलपाखे भन्सार पास जूया पिहावयाच्वंगु इलय् बरामद जूगु लुँ प्रकरणय् खुम्हेसित ज्वःगु दु। राजश्व अनुसन्धान विभागया कथं ज्वःपि मध्ये छम्ह भारतीय नागरिक नाप खुम्हेसित ज्वःगु दु।

विभागया कथं लुँ ज्वना वःगु स्कुटरया ब्रेक शु आयातकर्ता कम्पनी रेडी ट्रेडर्सया सञ्चालक दिलिप भुजेल, लुँ  पास यायेगुलि ग्वाहालियाम्ह वया पाजू राम कुमार भुजेल व कम्पनी स्थापना यायेत ग्वाहालि याम्ह हर्कराज राईयात विभागं नियन्त्रणय् काःगु दु। अथेहे, थुप्तेन छिरिङ तिब्बती मूलयाा भारतीय नागरिकयात ज्वःगु खः। मेपि निम्ह धाःसा भन्सार एजेन्ट व ट्याक्सी चालक खः।

त्रिभुवन अन्तर्राष्ट्रिय विमानस्थल स्रोतं धाःगु कथं, बरामद जूगु लुँ मंगलवाः क्याथे फ्यासिफिकया उडानं येँ वःगु खः। मोटरसाइकल व स्कुटरया ब्रेक शुदसने सूचुकाःगु हःगु उगु लुँ म्हिगः बहनि भन्सार जाँच पास याये धुका न्हिनय् २ बजे कटे जुइ धुकुगु सूचं वयेवः राजश्व अनुसन्धान विभागं कारबाहीया झ्वलय् उगु लुँ बरामद याःगु खः।

बरामद जूगु लुँ गुलि दु सिइमदुगनि। विभागं बरामद याःगु लुँ लनिइगु निति थौं राष्ट्र बैंकय् यकिइगु जूगु दु।

Categorized in अपराध