न्हूगु नेपाली थ्रीलर संकिपा ‘अपीच्य’या टिजर सार्वजनिक जूगु दु । निर्देशक प्रदीप खड्गीया निर्देशनय् निर्माण जूगु उगु ‘अपीच्य’ संकिपाया टिजरयात इन्टरटेन्टेमेन्ट नेपाली टिभी नांया यूट्युब च्यानलपाखें सार्वजनिक याःगु खः ।

संकिपाया टिजर सार्वजनिकयासें निर्देशक खड्गीं धाःगु दु, ‘हरर संकिपाया टिजर सार्वजनिक याये खनाः जिमि लसता पिज्वःगु दु । आः याकनं हे देय् न्यंकंया सिनेमा हलय् क्यनेत्यनागु दु।’ ‘अपीच्य’ खँग्वःया अर्थ रहस्य जुइ । रहस्य दुने ततमत क्यनाच्वंगु बाखनय् निर्माण जूगु जुयाः संकिपाया नां ‘अपीच्य’ जूवंगु निर्देशक खड्गीया धापू दु ।

लक्ष्मीकुमार महर्जन उदास, सनीश शाक्य, सलोना बज्राचार्य, सुरज व्यञ्जनकार, रवि गिरी, रचना सिंह, सुरेन्द्र मानन्धर, कृष्णभक्त महर्जन, राजेन्द्रकुमार महर्जन राजी, विनेश श्रेष्ठ, लुनिभाः खड्गी, लक्ष्मीनाथ मदगैया आदि कलाकारपिनिगु अभिनय दुथ्याःगु संकिपा ‘अपीच्य’ डेल्टा मल्टिमिडिया ब्यानरय् निर्माण जूगु खः ।

सुदन श्रेष्ठ, धर्म महर्जन व सुरेश महर्जनं निर्माण याःगु संकिपा ‘अपीच्य’य् रविन डंगोल व आयुष महर्जनया छायाँकन, विनेश श्रेष्ठया कला निर्देशन, सुशील राजोपाध्यायया बाखं सम्पादन दुथ्याः । थ्रीलर व हरर मिक्स जूगु संकिपा ‘अपीच्य’ या निर्देशक प्रदीप खड्गीं थ्वसिबें न्ह्यः ‘कीर्तिपुरः द लिजेण्ड अफ कीर्तिलक्ष्मी’, सार्वजनिक जुइ ल्यंदूगु बहुभाषी संकिपा ‘हिमआँधी’, नेपालभाषाया आपालं संकिपाय् ज्या यायेधुंकूगु दु ।

संकिपां थःगु प्रदर्शनया इलय् दर्शक न्ह्यःने छु गुज्वःगु छाप त्वःतीगु खः, व धाःसा संकिपा प्रदर्शनय् वयेधुंकाः जक सिइदइ ।

Categorized in मनोरन्जन