वरिष्ठ साहित्यकार मोहनबहादुर कायस्थया ‘म बन्दीपुरे भक्तपुरको’ नांया च्वसु मुना सफू वरिष्ठ साहित्यकार तिलकप्रकाश कायस्थं पितब्वज्या यानादीगु खः।

सिर्जना अभियान समाजया ग्वसालय् जूगु उगु ज्याझ्वः ख्वपया खौमा त्वालय् जूगु खः। उगु ज्याझ्वलय् न्ववादीसें वय्कलं कायस्थतय्त पृथ्वीनारायण शाहं स्वनिगः त्याकेधुंकाः अतिकं दुःख, कष्ट व यातना बिउगु चर्चा यानादिल। थौंकन्हय् ८० दँ दयेधुंकूम्ह वरिष्ठ साहित्यकार कायस्थया थ्व चय्प्यंगूगू सफू खःसा बन्दीपुरय् च्वनादीम्ह वय्कः पेशां इन्जिनियर खः ।

साहित्यकार कायस्थं थ्व स्वयां न्ह्यः नेपालभाषाया बाखं मुना सफू ‘ताय्मरु’, ‘स्वनिगलं पिने बन्दीपुर’, ‘ख्वपंनिसें बन्दीपुर तक’, पिथनादी धुंकूगु दुसा खस नेपाली भासं ‘बन्दीपुरको सुभाष’, ‘बन्दीपुरका साहित्यकारहरू’ लिसें बन्दीपुर सम्बन्धी आपालं सफू पिथनादी धुंकूगु दु।

अभियानया संयोजक धनमान श्रेष्ठया सभाध्यक्षताय् जूगु उगु ज्याझ्वलय् डा. विष्णु भण्डारीं सफूया समीक्षा यानादीगु खःसा अभियानया सचिव ध्रुव मधिकःमिं लसकुस यानादीगु खः।

ज्याझ्वलय् उत्तमनारायण मल्लं कायस्थतय् जात, जातिया पक्षयात कयाः नुगःखँ तयादीगु खःसा अमेरिकाय् च्वँच्वनादीम्ह डा. मनोरञ्जन धौभडेलं विदेशय् थःपिंसं भाषा, जाति, संस्कृतिया निंतिं ज्याझ्वः यानाच्वनागु खँ कनादीगु खः।

Categorized in राष्ट्रिय