गोरखापत्र संस्थानय् टिप्पणी आदेशय् नियुक्तजूपि १२ म्हेसिगु नियुक्ति खारेज
लहनान्युज | अनलाथ्व अष्टमी ११४३, सावन १० बुधवाः
राष्ट्रिय सतर्कता केन्द्रं गोरखापत्र संस्थानय् टिप्पणी आदेशया भरय् करारय् नियुक्त जूपि १२ म्हेसिगु नियुक्ति खारेज यायेत सञ्चार तथा सूचना प्रविधि मन्त्रालयं निर्देशन बिःगु दु।
विधि व प्रक्रिया अःखः नियुक्ति बिःगु धासे केन्द्रं कार्यकारी अध्यक्ष विष्णुप्रसाद सुवेदीनाप न्याम्हेसित कारबाही यायेत तक निर्देशन बिःगु दु। सुवेदी कार्यकारी निर्देशक जुया वये धुका गोरखापत्र संस्थानय् निम्ह उपसम्पादक, न्ह्यम्ह समाचारदाता, छम्ह परामर्शदाता व निम्ह वरिष्ठ सहायक पदय् नियुक्त याःगु खः।
थुगु नियुक्ति यायेगु प्रक्रिया मिले मजूगु धका सतर्कता केन्द्रं ठहर याःगु दु । ‘उमिगु नियुक्ति गोरखापत्र संस्थान कर्मचारी सेवा शर्त विनियमावली २०५२ या विनियम ४१ बमोजिम पदपूर्ति समितिया सिफारिसया आधारय् ज्वलापि मनू जुइमाःगुलि पदपूर्ति समितिया गठन नाप सिफारिस मयासे हे उगु विनियमावलीया प्रक्रिया पालना मयागु टिप्पणी आदेशया भरय् नियुक्ति याःगु,’ धका सतर्कता केन्द्रं धाःगु दु।
अथेहे उगु नियुक्ति खारेज याना गोरखापत्र संस्थानं कर्मचारी प्रशासन शाखाया वरिष्ठ सहायक रुपचन्द्र भट्ट, वरिष्ठ प्रशासन अधिकृत विमला खड्का, शाखा प्रमुख विक्रमबाबु राई, प्रशासन विभागया निमित्त निर्देशक ओमप्रकाश भुसाल व कार्यकारी निर्देशक विष्णुप्रसाद सुवेदीयात कारबाही यायेत सतर्कता केन्द्रं सञ्चार मन्त्रालययात निर्देशन बिःगु दु।
