विद्यालययात राजनीतिमुक्त क्षेत्र दय्केमाः, पुवं मेयर बिद्यासुन्दर
लहनान्युज | अनलागा द्धितीया ११४३, सावन १८ बिहीवाः
येँ महानगरपालिकाया मेयर बालेन्द्र साह छगू नं छगू इस्यूयात कयाः न्ह्याबलें चर्चाय् दया हे च्वं । ततःधंगु जुइमा, वा चीधंगु जुइमा, छुं छगू ज्या जुयाकथं थन मेयर साहया चर्चा थुलि याकनं जुइ, व खनां मनूत अजू हे चाः । पूर्व मेयर विद्यासुन्दर शाक्यं बजेट फ्यानाः स्वदँ न्ह्यः हे शिलान्यास जुयाः निर्माण जूगु नेपालभाषा मंकाः खलःया भवन जुइमा, कमलादीइ नीजि कम्पनीं दय्कूगु टावर जुइमा, संघीय सरकारया अधिकार क्षेत्रय् लाःगु मूल सडक निर्माण वा मर्मत, विद्यासुन्दरं न्ह्याकावंगु १०२ नम्बरया एम्बुलेन्स सेवा जुइमा, दक्वलिइ बालेनं याःगु धकाः थाय्थासय् चर्चा जुइ । थुलि हे जक नं मखु, संकिपाय् द हे मदुगु डायलगयात कयाः बालेनं छगू स्टाटस तयाकथं व स्टाटस राष्ट्रिय वहसया विषय जूवन ।
संकिपा निर्माण याःगु भारतीय कम्पनीं हे बालेनयात स्पष्टिकरण बियाः पौ च्वय्त बाध्य जुल । थ्व दक्वं ज्याय् गुलिं बालेनं याःगु खय्फु, गुलिं मखय्फु । थ्व सकतां खँया दथुइ शिक्षा क्षेत्रय् बालेनया पलाःयात कयाः धाःसा सर्वत्र तारीफ हे जुयाच्वंगु खः । शिक्षा क्षेत्रय् खनेदयाच्वंगु बेथिती चीकेत बालेनं ल्ह्वनाच्वंगु पलाः बांलाः धकाः सकसिनं धयाच्वंगु खः । तर आः वयाः थ्व क्षेत्रय् बालेनं आलोचना फय्माःगु अवस्था वःगु दु । येँ महानगर मातहतया दक्वं सामुदायिक विद्यालयय् व्यवस्थापन समिति भङ्ग यानाः वडाध्यक्षयात विद्यालय व्यवस्थापन समितिया अध्यक्ष घोषणा याय्धुंकाः थ्व निर्णययात कयाः सकभनं आलोचना व टीकाटीप्पणी जुयाच्वंगु दु ।
येँ महानगरया वंगु असार ३० गते जूगु नगरसभां थः मातहतया दक्वं विद्यालयया विद्यालय व्यवस्थापन समिति भंग यानाः सम्बन्धित वडाया वडाध्यक्षयात विद्यालय व्यवस्थापन समितिया पदेन अध्यक्ष दय्केगु निर्णय याःगु खः । उगु नगरसभां वर्तमान समिति भंग यानाः सम्बन्धित वडाया अध्यक्षयात विद्यालय व्यवस्थापन समितिया अध्यक्षया जिम्मेवारी बीगु प्रस्ताव पारित याःगुलिसें सामुदायिक विद्यालयया व्यवस्थापन समितिया अध्यक्ष व प्रधानाध्यापकं असन्तुष्टि क्यंगु दु । आः महानगरपालिका दुने ३२गू वडा दुसा उगु वडाया दुने ८९ सामुदायिक विद्यालय दु । न्हूगु व्यवस्था कथं छम्ह हे वडाध्यक्षं थःगु वडाय् दुगु दक्वं विद्यालयया व्यवस्थापन समितिया अध्यक्ष जुयाः ज्या याय्माली ।
येँ महानगरया निवर्तमान मेयर विद्यासुन्दर शाक्यं थःगु कार्यकालय् नं थज्याःगु प्रस्ताव वःगु तर विद्यालय दुने राजनीति हावी जुइ धकाः थम्हं उगु प्रस्ताव अस्वीकार यानागु धयादिल । ‘थ्व निर्णय विलकुल गलत खः । नेपाः देय्न्यंक ७५३ स्थानीय सरकार दु । देय्न्यंक हे थ्व हे नजिर च्वंवन धाःसा थुकिं गज्याःगु परिस्थिती हइ, कल्पना यानादिसँ । थुकिं पक्का नं बांलाःगु लिच्वः बीमखु’ निवर्तमान मेयर शाक्यं धयादिल ।
मेमेथाय् नं थज्याःगु अभ्यास मजूगु धाःसा मखु । मेमेथाय् न्हापाया थज्याःगु अभ्यास स्वय्बलय् नं असफल हे जूगु खनेदु । झापाया हल्दीबारी गाउँपालिकाय् नं रविन्द्रप्रसाद लिङ्देनया कार्यकाल (२०७४–०७९) य् अनया सामुदायिक विद्यालयया व्यवस्थापन समिति भङ्ग यानाः वडाध्यक्षतय्त समितिया अध्यक्ष दय्कल । तर न अनया पुलांगु समस्या हे ज्यन, न व्यवस्थापन हे बांलाक जुइफत ।
उगु ईया अनुभवयात कयाः हल्दीबारी गाउँपालिकाया निवर्तमान अध्यक्ष लिङ्देनं वडाध्यक्षयात विद्यालय व्यवस्थापन समितिया अध्यक्ष दय्केगु धइगु वयागु जिम्मेवारीयात चिनाबीगु खः धासें वडाध्यक्षं अनुगमन याय्गु, निर्देशन बीगु व व्यवस्थापनय् ग्वहालि जक याय्माःगु बिचाः तयादी । थज्याःगु हे बिचाः येँ महानगरया निवर्तमान मेयर शाक्यं नं तयादी । ‘मेयर उपमेयरया कार्यक्षेत्रया थःगु सम्पूर्ण स्थानीय तह खः, वडाध्यक्षया थःगु वडा खः । थःगु कार्यक्षेत्रय् मेयर, उपमेयर वा वडाध्यक्षं विद्यालयया अनुगमन याय्दइ, स्वय् दइ । थज्याःगु अवस्थाय् नं दक्व दक्व थासय् थः हे अध्यक्ष जुयाजुइगु खःसा गनं नं बांलाक स्वय् फइमखु’, शाक्यं धयादिल । ‘वडाध्यक्षं अनुगमन जक याय्गु खः, अध्यक्ष जूवनेगु मखु ।’
छखे विद्यालययात राजनीतिमुक्त क्षेत्र दय्केमाःगु अवस्था, मेखे वडाध्यक्षयात विद्यालय व्यवस्थापन समितिया अध्यक्ष दय्केगु निर्णय । वडाध्यक्ष धयापिं छुं न छुं राजनीतिकं दलं निर्वाचित जुयावःपिं जुयाच्वनी । दक्व दक्वथाय् स्वतन्त्र हे त्याइ धयागु मदु । अप्वः थासय् दलीय प्रतिनिधि हे निर्वाचित जूगु दु । छुं थासय् स्वतन्त्र त्याःगु हे दुसां कन्हय् वनाः छुं दलय् आवद्ध मजुइ वा न्हूगु दल मदय्की धकाः धाय् फइमखु । न्हूगु वा पुलांगु छुं नं दलय् आवद्ध जुयाखतं व दलया विचार, सिद्धान्तं प्रभावित पक्कां जुइ । अले राजनीतिक दलय् आवद्ध व्यक्तिपाखें विद्यालययात नं राजनीतिइ प्रभावित याय्त स्वइमखु धकाः धाय्फइ मखु ।
