देयन्यक दुगु खुगु महानगरपालिकामध्ये न्यागुलि आर्थिक दँ (आव) ०७९÷८० या बजेट विनियोजनमध्ये ६० प्रतिशत स्वया अप्पो खर्च याःगु दु सां देय् या हे तधःगु महानगर व अप्पो बजेट दुगु येँ महानगरपालिकाया खर्च धाःसा दकलय् म्हो ३६ प्रतिशत जक यायेफुगु दु। देयन्यक मेमेगु महानगरपालिकाया खर्च यायेग क्षमता अप्पोकेगु स्वयाच्वसा येँ धाःसा वःगु दँय् स्वया न म्हो जक जुगु दु।

येँ महानगरं वःगु आर्थिक दँ २०७९÷८० य् २५ अर्ब ४१ करोड ९६ लाख ९६ हजार रुपैयाँया बजेट हःगुलि आर्थिक दँ क्वचाःगुलि जम्मा ९ अर्ब १६ करोड ३३ लाख ७२ हजार जक खर्च याःगु दु। थ्व ३६ दशमलव ०४ प्रतिशत जक खः। अथेहे २०७४ य् न्हापागु पटक स्थानीय चुनाव जू स्वया दकलय् म्हो जक खः।

थ्व स्वया न्ह्यःया मेयर विद्यासुन्दर शाक्यया कार्यकालय् न्यागु आर्थिक दँया बजेट याःगु औसत खर्च ४३ दशमलव ३७ प्रतिशत थ्यःगु खः। महानगरपालिकां सुशासन नाप अन्तरसम्बन्धित क्षेत्रया लागि ४ अर्ब ४६ करोड ५८ लाख विनियोजन यागुलि ४४ करोड ३५ लाख जक खर्च याःगु खः। थ्व धयागु खर्चया १० प्रतिशत जक खः। सामाजिक विकास क्षेत्रया बजेटय् १ अर्ब ६२ करोड २८ लाख छुटे यागुलि २ अर्ब ४५ करोड २८ लाख खर्च याःगु खः। उगु शीर्षकय् लक्ष्य स्वया म्हो जक खर्च याःगु खः

बजेट छुटे यागुलि पूर्वाधार विकास क्षेत्रय् धाःसा खर्च तसकं निराशाजनक खने दु। पूर्वाधारया क्षेत्रय् वःगु वःगु आर्थिक दँय् ११ अर्ब ८ करोड ८९ लाख विनियोजन यागुलि जम्मा ३ अर्ब ७२ करोड जक खर्च याःगु खः। महानगरं कार्यालय सञ्चालन व प्रशासनिक ४ अर्ब ६८ करोड ९८ लाख विनियोजन यागुलि २ अर्ब ४९ करोड ५३ लाख खर्च याःगु दु। महानगरं आर्थिक विकासया क्षेत्रय् ५० करोड २१ लाख विनियोजन यागुलि आर्थिक दँया लिपागु इलय् तक ४ करोड ७३ लाख जक खर्च याःगु खः।

येँ महानगरं आन्तरिक राजस्वय् लक्ष्य स्वया ९७ करोड अप्पो ध्यवा म्होगु खः। आर्थिक र्दँ २०७९÷०८० य् आन्तरिक राजस्वय् ४ अर्ब ८५ करोड १० लाख लक्ष्य तःगु खःसा ५ अर्ब ८२ करोड २७ लाख रुपैयाँ म्होगु खः।

देयन्यक खुगु महानगरमध्ये दकलय् अप्पो ८० प्रतिशत बजेट खर्च वीरगञ्ज महानगरपालिकां याःगु दु। वंगु आर्थिक वर्ष ०७९÷८० य् वीरगञ्ज महानगरपालिकाया बजेट ४ अर्ब ४६ करोडमध्ये ३ अर्ब ५५ करोड रुपैयाँ खर्च याःगु दु। उगु कुल बजेटया ७९ दशमलव ६ प्रतिशत खः।

अथेहे विराटनगर महानगरपालिकाया बजेट खर्च धाःसा मेमेगु महानगरपालिकाया स्वया तुलनामा उत्साहजनक खने दु। महानगरपालिकां वंगु आर्थिक दँया ३ अर्ब ६२ करोड ५५ लाख ६७ हजारया बजेट हःगुलि उकि मध्ये ७६ दशमलव ५४ प्रतिशत अर्थात २ अर्ब ७७ करोड खर्च याःगु दु।

पोखरा महानगरपालिकां थःगु कुल बजेटया ६१ प्रतिशत खर्च याःगु दु। महानगरपालिकां ८ अर्ब ८४ करोड ६५ लाख रुपैयाँया बजेट हःगुलि ५ अर्ब ४५ करोड ५१ लाख ६८ हजार खर्च याःगु दु। थ्व धइगु कुल बजेटया ६१ दशमलव ६६ प्रतिशत खः। अथेह भरतपुर महानगरपालिकां ६७ प्रतिशत बजेट खर्च याःगु दु। महानगरपालिकां हःगु ६ अर्ब ५५ करोड बजेटमध्ये ४ अर्ब ३९ करोड खर्च याःगु दु ।

यल महानगरपालिकां हःगु कुल बजेट ६ अर्ब ३५ करोड ३५ लाखमध्ये ६५ प्रतिशत बजेट खर्च याःगु दु । चालु व पूँजीगत याना यल महानगरं ४ अर्ब १७ करोड ९३ लाख खर्च याःगु दु । चालुपाखे यल महानगरं १ अर्ब ६४ करोड २१ लाख रुपैयाँ खर्च याःगु दु सा पूँजीगतपाखे २ अर्ब ५३ करोड ७१ लाख रुपैयाँ खर्च याःगु दु।

Categorized in राष्ट्रिय