नेकपा (एमाले) या सार्वजनिक ज्याझ्वलय् पार्टी अध्यक्ष केपी शर्मा ओलीबाहेक मेपिनिगु किपा मछ्यलिइगु जुगु दु।

पार्टी व जनसंगठनया ग्वसालय् जुइगु सार्वजनिक ज्याझ्वलय् अध्यक्षबाहेक मेपिनिगु किपा मछ्यलेगु निर्णय जूगु दु धका एमाले उपमहासचिव विष्णु रिमालं सामाजिक सञ्जालपाखे जानकारी बिःगु दु।

सार्वजनिक ज्याझ्वलय् किपा छ्यलिइगु, आसनग्रहण व मञ्च व्यवस्थापन सम्बन्धी निर्णय परिपत्रपाखे छ्वयेगु धका रिमालं धाःगु दु। रिमालया कथं ज्याझ्वःया गरिमा व मर्यादा थकायेत सार्वजनिक ज्याझ्वलय् पार्टी अध्यक्ष बाहेक मेपिनिगु किपा मतयेगु निर्णय याःगु दु।

अथेहे, मञ्च वक्ता जक छ्यलिइगु, पाहाँपि दर्शकदीर्घाय् हे मर्यादित ढंगं च्वनिइगु व्यवस्था मिले यायेत निर्देशन बिइगु धका रिमालं धाःगु दु। आसनग्रहणया उद्घोषण यायेगु परम्परा क्वचायकेगु, ब्याज, स्वामा व खादा म्वायकेगु नीति एमाले काःगु दु।

एमाले अध्यक्ष ओलीं न आसन ग्रहण लगायत विषयया निर्णय जूगु धका म्हिगः बुधवाः सामाजिक सञ्जालपाखे जानकारी बिःगु खः।

Categorized in राजनीति