येँ महानगरपालिकाया ‘सञ्चार रजिस्ट्रार’ य् महेश काफ्ले नियुक्त जूगु दु। सञ्चार, सूचना नाप तथ्याङ्क व्यवस्थापनयात व्यवस्थित यायेत दयकूगु ‘सञ्चार तथा सूचना ऐन २०८०’ या दफा १८ बमोजिम कथं वयकःयात सञ्चार रजिस्ट्रार पदय् नियुक्त याःगु खः।

थुगु दफाय् सूचना प्रविधि विभागया प्रमुख सञ्चार रजिस्ट्रार जुइगु व्यवस्था याःगु दु। काफ्ले सूचना प्रविधि विभागया प्रमुखय् सरुवा जूगु खः। विभागीय प्रमुख नाप  काफ्ले रजिष्ट्रारया ज्याया जिम्मेवारी न कघाःगु दु। काफ्ले थौं हे पदबहाली न यानादीगु दु।

थ्व स्वया न्ह्यः वयकः सार्वजनिक निजी साझेदारी एकाईलय् खः। स्थानीय पत्रपत्रिका, एफ. एम. रेडियो, केवल टेलिभिजन, अनलाइन श्रव्यदृश्य माध्यम नापं अनलाइन पत्रपत्रिकाया अभिलेखन, नविकरण व नियमन यायेगु व अभिलेखन जूगु सञ्चार माध्यमयात गुगु थासय् तयेगु, इलय् वा दच्छि तक प्रेस पास जारी यायेगु ज्या रजिष्ट्रारपाखे जुइ।

महानगरपालिकां तथ्याङ्क व सूचना प्रविधि व्यवस्थापन, वेभ साइट, सामाजिक सञ्जाल, इमेल व्यवस्थापन, अनुगमन लिसे नियमन यायेगु, महानगरपालिकाया सञ्चार प्रतिष्ठानय् सदस्य सचिवया कथं ज्या यायेगु, सञ्चार रजिस्ट्रारया जिम्मेवारी तोके यायेगु जिम्मेवारी पूरा यायेगु ज्या हे रजिस्ट्रारपाखे यायेगु याइ।

नेपाःया संविधान याःगु धारा २२६ (१) या व्यवस्था कथं अनुसूची ८ व ९ लय् दुगु अधिकार बाँडफाँड यायेगु धलखय् उल्लेख दुगु सञ्चार सम्बन्धी अधिकारयात छ्यला महानगरपालिकां २०८० असारय् क्वचाःगु नगर सभाया १३ क्वःगु अधिवेशनया ऐनय् जारी जूगु खः। पत्रकारिता, प्रकाशन, प्रसारण, पत्रपत्रिका, सूचना, तथ्याङ्क, अभिलेख व्यवस्थापन व नियमन यायेगु स्पष्ट कानुनी व्यवस्थाया लागि ऐन जारी जूगु खः।

Categorized in राष्ट्रिय