२०८१ जेठ ७, सोमबार

प्रतिनिधिसभाय् गूगुं विषयगत समितिया सभापतिइ सर्वसम्मत

लहनान्युज | गुंलाथ्व एकादशी ११४३, भदौ १० आईतवाः

प्रतिनिधिसभाय् गूगुं विषयगत समितिया सभापतिइ सर्वसम्मत कथं ल्यःगु दु। उद्योग लिसे वाणिज्य व श्रम नाप उपभोक्ता हित समितिया सभापतिइ धाःसा निम्हेसिगु उम्मेदवारी वःगु दु।

प्रतिनिधिसभाय् झीगु विषयगत समितिया सभापतिइ ल्ययेगु निति कन्ह्यः सोमवाः निर्वाचन तयातःगु खः। उकिया छन्हु न्ह्यः थौं ११ बजेनिसे न्हिनय् ४ बजेतक उम्मेदवारी दर्ता यायेगु ई तयातःगु खः।

राष्ट्रिय स्वतन्त्र पार्टी बाहेकया दलपिन्स सभापतिइ भागवण्डा याना उगु कथं हे उम्मेदवारी बिःगु खः। ‘कन्ह्यः ३ बजे दक्को समितिया बैठक तयातःगु खः। छगु जक उम्मेदवारी लागुलि सर्वसम्मत निर्वाचित घोषणा जुइ’, संघीय संसदया सहायक प्रवक्ता दशरथ धमलां जानकारी बिःगु दु।

सार्वजनिक लेखा समिति सभापतिइ नेकपा एमालेया ऋषिकेश पोखरेलया जक उम्मेदवारी लाःगु दु। एमालेया हे किरण साहं महिला बालबालिका लिसे सामाजिक समितिइ सभापतिया उम्मेदवारी दर्ता याःगु खः। नेपाली कांग्रेसपाखे आरजु राणा देउवां कृषि, सहकारी लिसे प्राकृतिक स्रोत समिति, रामहरि खतिवडां राज्य व्यवस्था लिसे सुशासन समिति व सन्तोष चालिसे न अर्थ समितिया सभापतिइ उम्मेदवारी बिःगु खः।

कानुन, न्याय लिसे मानव अधिकार समितिया सभापतिइ माओवादी केन्द्रया विमला सुवेदीया जक उम्मेदवारी वःगु खः। दलपि दथुइ सहमतिइ माओवादीया भागय् लाःगु पूर्वाधार विकास समितिया सभापतिइ राप्रपाया दीपकबहादुर सिंहं उम्मेदवारी बिःगु खः। आइतवाः जक लिपागु इलय् माओवादी व राप्रपाया सहमतिइ सिंह उम्मेदवार बिःगु खः।

अन्तर्राष्ट्रिय सम्बन्ध व पर्यटन समितिया सभापतिइ जनता समाजवादी पार्टीया राजकिशोर यादवया जक उम्मेदवारी लाःगु खः। अथेहे स्वास्थ्य लिसे सूचना प्रविधि समितिया सभापतिइ एकीकृत समाजवादीया भानुभक्त जोशीं जक उम्मेदवारी दर्ता याःगु खः।

Categorized in राजनीति