बौद्ध ख्यलय् ऐतिहासिकता कःघाना वयाच्वंगु बैरोचन तीर्थय् थुगु दँया गुंलाया लसताय् बौद्ध धर्मप्रति मन क्वसायका वयाच्वनादीम्ह लोकरत्न शाक्य व संगीता शाक्यपिन्स सत्वपुजा यानादीगु दु।

सत्वपुजाय् मुलाचार्य राजु बज्राचार्यं नाप गुर्जुपिं सजन बज्राचार्य उपाध्याय प्रसन्न बज्राचार्य कर्माचार्य प्रमेन्द्र बज्राचार्य व अरुण बज्राचार्यपिन्स पुजा याकादीगु खः। थुगु दिनय् पुजाया झ्वलय् दाता लोकरत्न शाक्यजुं वैरोचन तीर्थ परिसरय् स्थापना यानातःगु क्वाःपाद्यः व चिभाःद्यःया पुजा नं याना बिज्यागु खः ।

अथेहे नामसंगीतियालिसें थीथी बौद्ध स्तोत्र नं पाठ यायगु ज्या गुर्जुपिन्सं याना बिज्यागु खः । महायान, बज्रयान बुद्ध धर्मयात संरक्षणयायेगु निति बज्रायानी गुरुजुपिन्सं बज्रयानी पुजाय् विशेष ध्यान बियाः वयाच्वंगु दु।

गुंला इलय् थीथी थासय् विराजमान जुया बिज्यापिं बौद्ध द्यःपिनिगु आराधना याना पुजा याना वयाच्वंगु दुसा गनं गनं सत्वपुजा याना धर्म कर्मया ज्यायात प्राथमिकता बिइगु याना वयाच्वंगु दु।

Categorized in राष्ट्रिय