ऐतिहासिक व पुरातात्त्विक महत्त्व जाःगु असंया क्वथुननि संरक्षण यायोमाःगु मागयासे भूमि व्यवस्था लिसे सहकारी मन्त्री रन्जिता श्रेष्ठ चौधरीया ज्ञापन पौ लःल्हाःगु दु।

असं क्वथुननि बचाउ अभियानं मन्त्री श्रेष्ठयात सम्बन्धित थासय् निरीक्षण याके धुका ज्ञापन पौ लःहाःगु खः। अभियानं लःल्हाःगु उगु  ज्ञापन पौ कयादीसे मन्त्री श्रेष्ठं क्वथुननिया विषय थःगु ध्यानाकर्षण जूगु दु थुगु विषय सत्यतथ्य थुइका ज्या न्ह्याकेगु भलसा बियादीगु खः।

क्वथुननिइ न्यासः दँ पुलांगु अमिताभ बुद्ध द्यः नाप मेमेगु न यक्को हे पुलागु पुरातात्त्विक महत्त्वया सामग्री दु । उगु थाय् अशोक वृक्ष बिहारया नामं न म्हसिइगु याः। ‘मौलिक सम्पदाया गुठीयारपिनिगु प्रभावय् लाकां छुट गुठीया नामय् निजी रैकर उल्लेख याना नक्कली पूर्जा दयकूगु खः।

लिपागु इलय् अस्थिर राजनीतियात फाइदा कया उगु थासयाःगु मौलिकता स्यकां व्यावसायिक भवन दयकेगु योजना दयकूगु दु।’ अभियानया नमस्ते साय्मि धाःगु दु। वायु देवता गुठी उल्लेख याना ८ आन २ पैसा जग्गाय् छेँ दयका तःगु खः।

Categorized in राष्ट्रिय