सर्वोच्च अदालतं कोशी प्रदेशया मुख्यमन्त्री उद्धव थापायात पदमुक्त जूगु फैसला न्यकूगु दु।

नापं प्रदेशसभाया दकलय् तधःगु दल नेकपा एमालेया संसदीय दलया नेता हिक्मतकुमार कार्कीयात ४८ घौं दुने न्हुम्ह मुख्यमन्त्री नियुक्त यायेत परमादेश बिःगु दु।

आदेशया संक्षिप्त विवरण तयार याये धुकां न्यायाधीश सपना प्रधान मल्ल इजलासय् वना बुँदागत रूपं संक्षिप्त विवरण न्यकादीगु खः। उगु झ्वलय् वयकलं कार्यकारिणी अधिकार निहित मन्त्रिपरिषदयात ताःई तक तदर्थय् तयेगु बालाइ मखु अथे जुगुलि ४८ घौ दुने कार्कीयात मुख्यमन्त्रीइ नियुक्त यायेत परमादेश जारी यानागु दु धका धयादीगु दु।

वंगु साउन १६ गते मुख्यमन्त्रीइ नियुक्त जूम्ह थापां प्रदेशसभा बैठकया अध्यक्षता यानाच्वम्ह इस्राइल मन्सुरीयात मतदान याकां भदौ ४ गते प्रदेश सभापाखे विश्वास काःगु खः।

Categorized in राष्ट्रिय