गृह मन्त्रालयं झिम्ह सहसचिवपिनिगु जिम्मेवारी उखेथुखे याःगु दु। गृह मन्त्रालयं अध्यागमन विभागया महानिर्देशकय् रुद्रसिंह तामाङयात छ्वंगू दु।

वयकः थ्व स्वया न्ह्यः राष्ट्रिय विपद् जोखिम न्यूनीकरण लिसे व्यवस्थापन प्राधिकरणय् वःगु खः। थ्व स्वया न्ह्यः महानिर्देशक झलकराम अधिकारी लुँ  तस्करीइ संलग्न दावा छिरिङनाप स्वापू दुगु लुइवं गृह मन्त्रालयय् हया आः सामान्य प्रशासन मन्त्रालयया अतिरिक्त समूहय् सरुवा याःगु खः।

आः तामाङं अध्यागमन विभागय् नेतृत्व याइगु जुगु दु। विपद व्यवस्थापन प्राधिकरणय् जयनारायण आचार्यय् वःगु दु। अथेहे त्रिभुवन विमानस्थल अध्यागमन प्रमुखय् गोगनबहादुर हमाल सरुवा याःगु दु। गृहं प्यम्ह प्रमुख जिल्ला अधिकारीपिन्त उखे थुखे याःगु दु। रोशनीकुमारी श्रेष्ठयात ख्वपया प्रमुख जिल्ला अधिकारी दयकूगु दु।

सहसचिव गणेश अर्यालयात रुपन्देहीया प्रमुख जिल्ला अधिकारीइ दयकूगु दु। वयकः थ्व स्वया न्ह्यः यल महानगरपालिकाया प्रमुख प्रशासकीय अधिकृत जूया गृह प्रशासनय् वःगु खः । अथेहे रामवन्धु सुवेदीयात दाङ व शिवराम गेलालयात महोत्तरीइ प्रमुख जिल्ला अधिकारीइ सरुवा याःगु दु।

सहसचिवपि दीपककुमार पहाडी, भरतमणि पाण्डे, खगेन्द्रप्रसाद रिजालयात गृह मन्त्रालयय् सरुवा याःगु दु ।

Categorized in राष्ट्रिय