नेकपा एमालेया उपाध्यक्ष सुवास नेम्वाङ मन्त। थौं चान्ह्यः १ बजे हृदयघात जुया वयकः त्रिवि शिक्षण अस्पताल, महाराजगञ्जय् यकूगु खः ।

चिकित्सकपिन्स अस्पतालय् थ्यनेवं हे नेम्वाङ मदुगु घोषणा याःगु धका अस्पतालया स्रोत धाःगु दु। इलामबजार नापसं सुन्तलाबारय् बूम्ह नेम्वाङ इलाम क्याम्पसय् ब्बना च्वंगु इलय् हे अनेरास्ववियुय् लगे जूया २०२९ साल निसे कम्युनिस्ट राजनीतिइ दुहावम्ह खः।

२०३३ सालय् राजद्रोह मुद्दाय् छु ई जेलय् लाःगु खः। २०४८ व २०५२ सालय् राष्ट्रिय सभाया सदस्य जुयादीम्ह वयकः मनमोहन अधिकारी नेतृत्वया न्हापागु कम्युनिस्ट सरकारय् कानुन, न्याय लिसे संसदीय व्यवस्था मन्त्री जुयादीगु खः। वयकः जनआन्दोलन २०६२–६३ नापं पुर्नस्थापित संसदय् न सभामुख जूयादीगु खः।

२०६४ व २०७० य् इलामपाखे चुनाव त्याकादीया संविधानसभाया अध्यक्ष जूयादीगु खः। प्यकं तक सभामुख जुयादीगुलि वयकः न्ह्यावलय् सर्वसम्मत जूयादीम्ह खः।

Categorized in राष्ट्रिय