येँ महानगरपालिका २३ वडाया ग्वसालय् थौंनिसे प्रयागराज सिंह सुवाल स्मृति अन्तरवडा फुटसल सुरु जूगु दु ।

थौं जूगु कासाय् ग्वसाः खलः २३ वडा विजयी सुरुवात याःगु दु । येँया लैनचौर फुटसल मैदानय् जूगु उलेज्या कासाय् २३ वडां येँ महानगरपालिकायात ५–३ गोलं बुकूगु खः ।

कासाय् २३ वडाया विशाल श्रेष्ठं ह्याट्रिक याःगु खःसा सिरिस महर्जन व सुमिन मानन्धरं छगू छगू गोल याःगु खः । येँ महानगरपालिकाया निंतिं विनय शाक्य व गौरवं गोल याःगु खः ।

मंगलवाः हे जूगु मेगु कासाय् १४ वडां ३० वडायात ३–१ व २२ वडा १६ वडायात ३–० गोलं बुकल । २२ वडाया निंतिं सुशील खड्गीं ह्याट्रिक याःगु खः । बुधवाः ५ वडां २६ वडा लिसे, २८ वडां २४ वडा लिसे, २१ वडां १३ वडांलिसे १२ वडा १८ वडा लिसे धेंधेंबल्लाः याइ । येँ महानगरया मेयर बालेन्द्र साहं उलेज्या याःगु धेंधें बल्लाःया फाइनल कासा असोज ३ गते जुइ ।

येँ महानगरपालिका केन्द्र लिसें स्वीगू वडां धेंधे ंबल्लाखय् ब्वति कयाच्वंगु दु । नकआउटया आधारय् जूगु कासाय् विजेत टिमयात ट्रफि व निगू लाख तका सिरपाः बीसा उपविजेतायात छगू लाख तका बी ।

अथेहे विधागतपाखे उत्कृष्ट कासामि, यक्व गोल याःम्ह व उत्कृष्ट गोलकिपरयात झिद्वः झिद्वः तका दां सिरपाः बीगु खँ ग्वसाः वडा २३ या अध्यक्ष मचाराजा महर्जनं कनादीगु दु ।

Categorized in कासा