नेपालभाषा एकेडेमीयात दान्यहेरा सिरपा बिइगु निति सिरपाया दाता यज्ञरत्न धाख्वाः न्यय्गू लख तका लःल्हागु दु ।

एकेडेमीया चान्सलर यज्ञरत्न धाख्वाः थः मदुम्ह अबु दानरत्न शाक्यया नामं व थः मदुम्ह जहान हिरादेवी शाक्यया नामय् दान्यहेरा सिरपाः बियावया च्वंगु खः। साहित्य, संगीत व विज्ञान प्रविधी ख्यःयात कःघाना बियावया च्वंगु थुगु दान्यहेरा सिरपा न्हापा साहित्य व संगीत ख्यः दच्छि दच्छि अतःगाना बिया वयाच्वंगु खःसा छम्हेसित दान्यहेरा सिरपा व छम्हेसित दान्यहेरा हःपाः सिरपा धका बियावया च्वंगु खः।

आः थुगुसिइ निसें स्वंगुलिं विधाया छम्ह छम्ह व्यक्तित्वयात लाइफ टाइम एचिभमेंट अवार्ड कथं न्यय्द्वः न्यय्द्वः तकाया दान्यहेरा सिरपा लःल्हायेगु क्वछिउगु दु । सिरपाया ग्वसाः ताःलाक न्ह्याका यंकेगु निंतिं छगू दान्यहेरा सिरपा समिती नं निस्वंगु दु । उगु समितिइ नेपालभाषा एकेडेमीया भाइस चान्सलर पदेन अध्यक्ष जुइगु व्यवस्था यानातःगु दु ।

थुगु व्यवस्था कथं आःयात एकेडेमीया भाइस चान्सलर मल्ल के सुन्दर उगु समितिया नायः जुयादीगु दु। मूक्कं न्याम्ह दुजः दइगु उगु समितिइ दाताया प्रतिनिधि, नेपालभाषा परिषदया प्रतिनिधि, मिसा प्राज्ञ छम्ह छम्ह दुजः व एकेडेमीया दाँभरीं थ्व समितिया नं दाँभरीं जुइगु व्यवस्था यानातःगु दु ।

थ्व ल्याखँ आः यात एकेडेमीया दाँभरीं वीरप्रसाद भन्सारीं उगु भाला क्वबियादीगु दु । थुकथं निस्वंगु समितियात दाता एकेडेमीया चान्सलर यज्ञरत्न धाख्वाः नं न्यय्गु लखतकाया चेक लःल्हानादीगु दुसाः थ्वहे समितिपाखें आवंलि दँयदसं दान्यहेरा सिरपा देछायेगु ज्याझ्वः जुइगु जूगु दु।

 

Categorized in राष्ट्रिय