२०८१ आषाढ ७, शुक्रबार

एसिया कप बूसां लय्तागु दु नेपाली क्रिकेट

प्रजित शाक्य | यंलाथ्व द्धितीया ११४३, भाद्र ३१ आईतवाः

नेपाःया क्रिकेट टिमया प्रशंसा नेपाः जक मखु हलियकं जुयाच्वंगु दु । एसिया कप क्रिकेटय् भारत व पाकिस्तान दथुइ जुगु कासाय् च्वछाय् बः जुइक म्हितिगुलि नेपाःया क्रिकेटया चर्चा जुगु दु। एसिया कपय् नेपाली क्रिकेटया सम्मान व प्रतिष्ठा थहावंगु दु।
 
एसिया कपय् नेपाःया थ्व न्हापागु कासा खः । एसिया कप विश्व क्रिकेट छगु तधःगु कासा खः। टेस्ट म्हितीइगु १२ राष्ट्रमध्ये भारत व पाकिस्तान नापं न्यागु देशं ब्बति काइगु जुगुलि एसिया कपयात मिनी विश्वकप क्रिकेट न धायेगु याइ । उकिइ थुगु कासा म्हितिइगु म्हगस न्हापानिसे खना च्वंगु खः । खय्तला २१ दँ न्ह्यः न नेपाः एसिया कपय् थ्यःगु खः। तर भारत व पाकिस्तान दथुइ तनावं याना उगु इलय् एसिाय कप मजुगु खः । नेपाल एसिया कपय् छनोट जूसा हिस्स जुइमाःगु खः।
 
लिपा नेपाली क्रिकेटया निगु पुस्तां भारत व पाकिस्ताननाप क्रिकेट म्हितिइगु म्हगस खंकूगु खः। उगु म्हगस आः थुगु पुस्तां नकतिनि पूया याइगु दु। एसिसी प्रिमियर कप उपाधि त्याके धुका नेपालं थुगु पटक एसिया कपय् थःगु थाय् पक्का याःगु खः। आः बल्ल क्रिकेटय् न नेपाल क्रिकेटय् निगु महाशक्ति भारत व पाकिस्ताननापया दुरी कम याःगु दु। थ्व स्वया न्ह्यः, भौगोलिक दुरी जुइ धुकां क्रिकेटय् थुगु निगु देय् नाप नेपाःया दुरी तसकं ताःपाना च्वंगु खः।
 
एसिया कपय् नेपाः, भारत व पाकिस्तानया पुचलय् लाःगु खः। थथे स्वयेगु खःसा निगु उपाधि दावेदारपिनिगु पुचलय् नेपाःयात च्यूता जुइमाःगु खः। तर अय्न ड्र नं नेपाः व नेपाली क्रिकेट समर्थकपि लय्तागु दु। छाय् धासां नेपाली क्रिकेटय् पाकिस्तान व भारतनापं म्हितिइगु निति न्हापांनिसे पियाच्वंगु खः। विश्व क्रिकेटय् भारत व पाकिस्तानया तधःगु नां दु। क्रिकेटय् थुगु निगु देय्या दथुइ गनं तक मदु। उकिइ भारत व पाकिस्तान दथुइ समूहपाखे नेपाःया सुपर फोरय् थ्यकिइगु भलसा न मदु। तर नेपाःपिनिगु समर्थकया इच्छा एसिया कपय् भारत व पाकिस्ताननाप टक्करया कासा म्हितां नेपाली क्रिकेटया छवि च्वये थ्यकिइगु धइगु खः। उगु नेपाःया क्रिकेटरपिन्स पुरा न याना बिःगु दु।
 
खय्तला नेपालं निगु हे कासाय् बामलाक्क बूगु दु । न्हापागु कासा पाकिस्ताननापं २३८ रनं व  भारतनाप झिगु विकेटं बूगु खः। तर उगु निगुलि हे स्कोरकार्डं नेपाःया प्रदर्शनबारे मिसगाइड यायेफु। छाय् धासा निगु हे कासा नेपालं थःगु छाप त्वःता हलियकं थःगु प्रशंसा याकेत बाध्य याःगु दु। पाकिस्तानविरुद्धया न्हापागु कासाय् नेपालं न्हापां फिल्डिङ याःगु खः । पाकिस्तान विश्वया नम्बर १ टिम खः। उकिइ विश्वया उत्कृष्ट ब्याट्सम्यानपि यक्को दु। तर अज्यागु टिमविरुद्धया पालिइ सुरु याःगु ३० ओभर तक नेपाःया हावी जूगु खः। नेपाःया बलिङ आक्रमणं ब्याटिङ पिचय् अनुशासित व नियन्त्रित बलिङ यासे पाकिस्तानयात दबाबय् तःगु खः। उगु अनुशासित बलिङं नेपालं पाकिस्तानया सुरुया प्यंगू विकेट १२५ रनय् कायेवं नेपालं चमत्कार याइगु भलसा काःगु खः।
 
अय्न पाकिस्तानया कप्तान बाबर व इप्mिटकार अहमदं १३१ बलय् २१४ रनया विस्फोटक दोहोरो साझेदारी यायेवं कासाय् नेपाःया समस्या याना बिःगु खः। विश्वया नम्बर १ ब्याट्सम्यान बाबरं १३१ बलय् १५१ रनया शानदार पालि म्हितूगु खः। करण केसीं ५५ रन जुगु इलय् थःगु हे बलिङय् बाबरया क्याच त्वःतूगु खः । बाबर जक मखु प्रारम्भिक ब्याट्सम्यान इमाम उल हकं याउकं क्याच न विकेटकिपर आसिफ शेखं त्वःतूगु खः। उगु कासाय् पाकिस्तानं इप्mिटकार अहमदं न ७१ बलय् अविजित १०९ रनया विस्फोटक पालि म्हितूगु खः। उगु कासाय् नेपाली बलरपिनिगु अन्तर्राष्ट्रिय अनुभवया कमी याउक खने दु।
 
पाकिस्तानविरुद्धया ब्याटिङय् धासा नेपाःया धराशायी हे जुलं। ओपनर कुशल भुर्तेलं सुरुइ निगु बलय् हे निगु चौकानापं च्यागु रन दय्के वं नेपाःया सुरुआत सकारात्मक खने दुगु खः। तर तेज बलर साहिन सा आफ्रिदीया प्रेरणां दुगु पाकिस्तानया तेज बलिङ आक्रमणं नेपाःया ब्याट्सम्यानपि निरिह जुल व नेपाःया ब्याट्सम्यानपि बुलुहु बुलुहु छम्ह छम्हयाना पवेलियनय् लिहावनं। उगु कासाय् सोमपालं प्यंगु चौकानापं दकलय् अप्पो २८ रन दयकूगु खः। आरिफया ब्याट्पाखे २६ रन दयकूगु खः।
 
न्हापागु कासाय् पाकिस्तानविरुद्ध कमजोर ब्याटिङ याःगु नेपालं मेगु विश्वस्तरीय बलिङ आक्रमणं धराशायी जुइ संशय जूगु खः। तर नेपाःया ब्याट्सम्यानपिन्स भारतया तेज व स्पीन बलिङ आक्रमणया प्रशंसालायक ब्याटिङ याःगु खः । भारतया विश्वस्तरीय बलिङ आक्रमण न्ह्यने कुशल भुर्तेल, आसिफ शेख, सोमपाल कामी व दिपेन्द्र सिंह ऐरीं चौका, छक्का थ्वागुलि विश्व क्रिकेटय् थःपिनिगु ध्यान साःगु खः। नेपाःया ब्याट्सम्यानपिन्स भारतविरुद्धया कासाय् ४८.१ ओभरय् २३० रन दयका एसिया कपय् दकलय् अप्पो चर्चाया विषय जूगु खः। अय्न भारतं लिसः बिइगु झ्वलय् वाः वयेवं नेपाःया घाटा जूगु खः। वाः वया प्याःगू मैदानय् बलयार्त ‘ग्रिप’ यायेत थाकुगुलि न नेपाःया बलरपिन्त बेफाइदा जूगु खः । उकिया फाइदा भारतया निम्ह ब्याट्सम्यान रोहित शर्मा व शुभमन गिलपिन्त जुल ।
 
निगु कासा बूइवं नेपाली क्रिकेटय् मतिना याइपि नेपाःया क्रिकेटपिन्त तसकं लसतां भय् बिःगु खः। अय् न समर्थक जक मखु चिधःगु–तधःगु, क्रिकेट थुपि–मथुपि, जनता–नेता सकसिया थुकियात न उपलब्धि कथं हे लसता प्वकूगु दु। नेपाः आः विश्व क्रिकेटय् तधःगु टिमया कथं न्ह्यावनेगु लँपू क्यःगु दु। थुगु कासा लिपा क्रिकेट विज्ञपिन्स विश्व क्रिकेटया सर्वोच्च संस्था अन्तर्राष्ट्रिय क्रिकेट काउन्सिल (आइसीसी) न नेपाःयात अप्पो स्वया अप्पो ग्वाहालि यायेमाःगु सः थ्वःगु दु। आइसीसीं न नेपाः तधःगु सम्भावना दुगु देय् कथं कयाच्वंगु दु। एसिया कपया छाप त्वःत्ये धुकां आः नेपाःया क्रिकेट याःगु सम्भावनाया लँ चाःगु दु। आः पक्का न थीथी देशय् जुइगु  फ्रेञ्चाइ लिगय् नेपाःया क्रिकेटरपि थ्यःगु दु।