वंगु च्यान्हु न्ह्यनिसे राष्ट्रिय सभा गृह न्ह्यने दनां बिरोध यानाच्वपि अभियन्ता ईः या आन्दोलनय् समर्थन यायेत राप्रपा नेपालया अध्यक्ष कमल थापा व नेकपा एमालेया उपाध्यक्ष सुरेन्द्र पाण्डे वंगु दु।

बःपसः व्यवसायीपिन्त महानगरपालिककां क्रुरतापूर्ण व्यवहार याःगु धासे अभियन्ता ईः दना विरोध यानाच्वंगु खः। उगु झ्वलय् पूर्वउपप्रधानमन्त्री थापा व पूर्वमन्त्री पाण्डे ईः नापं छु भचा ई दना समर्थन याःगु खः।

थापां ज्वंना तःगु प्लेकार्डय् च्वया तःगु दु, ‘जितः बालेन यः, जितः ईः यः। ईः नं ल्ह्वंगु मुद्दा जायज खः। सतक, बःपसः यःयःथे तये मज्यु तर, राज्यं उमित व्यवसाय यायेगु निति बालांगु थाय् बिइमा। थ्व राज्यया कर्तव्य खः । थुगु ज्याय् महानगरपालिकां सहजिकरण यायेमाः।’

अथेहे पूर्वअर्थमन्त्री पाण्डें ज्वनातःगु प्लेकार्डय् च्वया तःगु दु ‘सतक–साइकल–गाडा–परम्परागत मजदुर उद्यमीयात विस्थापित यायेगु बन्द याः । विकल्प बिउ।’ 

Categorized in राष्ट्रिय