जनतायात बीगु सुविधा सर्वसुलभ यायेमाः
दिलिप शाही “शान्ति यज्जु” | यंलागा पंचमी ११४३, असोज १७ बुधवाः
सरकारया ज्या आम सर्वसाधारण जनतायात गुगुं नं कथंया राज्य बीगु सुविधा सर्वसुलभ याकेगु खः । आम जनतायात माःगु थीथी कथंया सुविधा उपलब्ध याकेगु धकाः थीथी सरकारी निकाय निसें कयाः स्थानीय निकाययात कानुन दयेकाः हे दायित्व क्वःछिनातःगु दु । देशय् न्हूगु संविधान जारी जुइधुकां नं सर्वसाधरण जनतां नागरिकता छगू कायेगु नितिं अझ नं जिल्ला प्रशासन कार्यालय वनेमाःगु अवस्था दु । गुकिं यानाः जिल्ला प्रशासन कार्यालय अनावश्यक रुपं भिड जुइगु यानाच्वंगु दु ।
जिल्ला प्रशासन कार्यालय जक मखु लाइसेन्स बीगु यातायात व्यवस्था विभाग निसें पासपोर्टया नितिं च्वनेमाःगु लाइन अझ नं म्हो मजूनि । खय्त ला वर्तमान सरकार नीस्वनेधुंकाः पासपोर्ट व लाइसेन्स कायेगु लाइन म्हो जुयाच्वंगु दु । तर थ्व अझ नं पर्याप्त मखु । विशेष यानाः सरकारं इलय् लाइसेन्सया नितिं माःगु कार्ड इलय् छापे मयाःगु कारणं यानाः अझ नं गुलिखें सर्वसाधारण जनता लाइसेन्स कायेगु नितिं लां लां पीमाःगु अवस्था दु । सरकारं इलय् निर्णय मयाःगु कारणं यानाः थज्याःगु समस्या ब्वलनाच्वंगु खँय् निगू मत मदु । जनतायात इलय् सुविधा मन्त धाःसा सर्वसाधारण जनतां यायेमाःगु ज्या इलय् मजूयाः थीथी कथंया समस्या फयेत बाध्य जुयाच्वंगु दु । सरकारया दायित्व थज्याःगु समस्या मवयेमा धइगु जुइमाःगु खः । तर अथे जुइ फयाच्वंगु मदु । गुकिया कारणं यानाः जनतां सास्ती फयेमालाच्वंगु दु ।
सरकारया जक मखु सरकारी निकायया थीथी कथंया ज्यां यानाः थौं जनता समस्याय् लानाच्वंगु जक मखु आर्थिक रुपं तकं द्यापं फयेमालाच्वंगु दु। थौं कन्हय् सामाजिक सञ्जालय् छगू भिडियो भाइरल जुयाच्वंगु दु। येँया पुतली सतकं कुमारी हलपाखे वनेगु लँ वान वे यानातःगु दु । तर ट्राफिक प्रहरी धाःसा वान वेय् दुहां वनेगु थासय् मखु। वान वे यानातःगु लँया दथुइ च्वनाः वान वे दुहां वःपिं चालकतय् लाइसेन्स कायेगु यानाच्वंगु दु । थ्व तसकं सरकारी निकायया गैरजिम्मेवारी ज्या खः। ट्राफिक प्रहरीया दायित्व वान वे पाखे सवारी साधन दुहां मवनेमा धइगु खःसा वान वे शुरु जुइगु थासय् च्वनाः सवारी चालकयात पनेमाःगु खः। तर अथे पनाच्वंगु मदु । राज्यया दायित्व जनतां अपराध मयायेमा धइगु जुइमाःगु खः । तर नेपालय् बिडम्बना राज्यं न्हापा अपराध याकाः लिपा वनाः बँ पुइकेगु गुगु ज्या ट्राफिक प्रहरी न्ह्याकाच्वंगु दु थ्व दुःखया खँ खः। थ्व धइगु राज्य न्हापां सर्वसाधारण जनतायात अपराध याकाः लिपा दण्डित यायेगु ज्या छगू कथं निण्डनीय खः । अले राज्य थुकथं सर्वसाधारण जनतायात अपराध उन्मुख यानाः उमित दण्डित यायेगु कानुनी नं गलत खः । अपराध पनेमाःगु निकायं हे अपराधयात तिबः बीगु ज्या थुकिं जुयाच्वंगु जक मखुला धकाः ट्राफिक प्रहरी थुइकेमाःगु आवश्यकता थौं जुयाच्वंगु दु।
अझ नखः चखः न्ह्यःने वःलिसे थीथी थासय् च्वनाः प्रहरी लाइसेन्स व ब्लुबुक चेक यायेगु ज्या यानाच्वंगु दु। अले छुं गथे जुयाः चालकयाके लाइसेन्स मन्त धाःसा पुइकेगु बँ धाःसा सर्वसाधारण जनताया नितिं बोेझ जुयाच्वंगु दु । लाइसेन्स मदुम्ह छम्ह चालकयात ट्राफिक प्रहरी म्होतिं नं निद्वः तका बँ पुइकेगु ज्या यानाच्वंगु दु । गुगुं कि नेपाःमि जनताया नितिं थ्व तःधंगु बोझ खः । उकथं हे छक्वः वान वे उल्लंघन यात धाःसा न्हापाखुसी न्यासः तका बँ पुइकेगु यानाच्वंगु दु । अले निक्वःखुसी नं उगु वान वे उल्लंघन यात धाःसा द्वछि तका बँ पुइकेगु यानाच्वंगु दु । वयां लिपा न्ह्याक्व हे वान वेय्या उल्लंघन यातधाःसां तप्यंक झिंन्यासः तका बँ फइकेगु ज्या यानाच्वंगु दु । थ्व धइगु सर्वसाधारण जनतां यानाच्वंगु सामान्य अपराधय् पुलेमाःगु जरिवाना झीगु औसत औकात स्वयां नं अप्वः खः । नेपाःमि जनताया आयस्तर स्वयेगु खःसा थुलिमछि बँ पुलेगु क्षमता पक्का नं मदु । तर ट्राफिक प्रहरी गुगु बँ पुइकेगु ज्या यानाच्वंगु दु थुकियात भिंकेमाःगु आवश्यकता दु ।
दकलय् मू खँ ला छु धाःसा ट्राफिक प्रहरी थौंकन्हय् गुकथं सवारी चालकयात ज्वनेगु नितिं यानाच्वंगु थीथी ज्या नं ट्राफिक प्रहरीयात कयाः चर्चा परिचर्चाया लिसे कुँखिनेगु ज्या नं जुयाच्वंगु दु । खः सर्वसाधारण जनतायात नियम कानुन क्यनाः उमित अपराध पाखे बचे यायेगु दायित्व प्रहरीया खः । तर थौंकन्हय् ट्राफिक प्रहरी यानाच्वंगु ज्या यानाः धाःसा अप्वः विरोध जुयाच्वंगु दु । गुलिखें थासय् ट्राफिक प्रहरी चेकिङ यायेत च्वनाच्वनीगु थाय् गलत जुयाच्वंगु दुसा गुलिखें थासय् ट्राफिक प्रहरी सुलाच्वनेगु यानाच्वंगु दु । ट्राफिक प्रहरीया थज्याःगु प्रवृत्तियात कयाः विरोध जुयाच्वंसां नं ट्राफिक प्रहरी थःत सुधार धाःसा याये फयाच्वंगु मदु वा यानाच्वंगु मदु । थुकिया कारण छु खः ? जनतायात सुधार यायेगु नामय् लाथेपाथे बँ पुइकेगु गलत ज्या खः । छखे सरकारं हे इलय् लाइसेन्स बी फयाच्वंगु मदु । अझ लाइसेन्सया ट्रायल बीगु थासय् थीथी व्यक्तितय्सं याइगु चलखेलया कारणं यानाः नं ट्राफिक प्रहरीया ज्यायात कयाः न्ह्यसः ब्वलनेगु यानाच्वंगु दु ।
अथे जुयाः सवारी चालकयात पुइकेगु यानाच्वंगु थीथी कथंया बँ पुनरावलोकन जुइमाःगु दुसा मेखे गन वान वे धकाः धयातःगु थाय् खः अन हे ट्राफिक प्रहरी च्वनाः वनेमजिउ थासय् वनेमते धकाः पनेमाःगु आवश्यकता दु । खुँ थें सुलासुला जनतायात कारबाही यायेगु ज्या गुगुं नं हालतय् उचित मखु । गलत ज्या यातधाःसा कारबाही यायेमाः थुकी निगू मत दइ मखु । येँ आपालं लँ गुगु वान वे खः मखु धकाः सर्वसाधारण जनतां मसिउगु । गुकिं यानाः चालकपिं अज्याःगु लँपुइ वनेगु यानाच्वंगु दु । थके वनेमाःगु सतकया ज्ञान मदयाः जुइगु थज्याःगु ज्यायात पनेगु दायित्व ट्राफिक प्रहरीया हे खः । उके वान वे दुहां वनेगु लँपुइ च्वनाः सवारी साधन दुतमछ्वयेगु ज्या यायेमाः । नकि वान वे लँय् दथुइ च्वनाः थम्हं मसिक दुहां वःपिं चालकयात कारबाही यानाः बँ पुइकेगु गुलि उचित ?
