मोहनि व स्वन्ति नखःया लसताय् सरकारं थौंनिसे स्वनिगः लगायत थीथी थासय् सुपथ मूल्य पसः सञ्चालन याइगु जूगु दु।

उपभोक्ता तयेत सहुलियत भावं न्हिन्हिया न्हि उपभोग्य वस्तु उपलब्ध यायेगु उद्देश्यं उद्योग, वाणिज्य लिसे आपूर्ति मन्त्रालय मातहतया खाद्य व्यवस्था लिसे व्यापार कम्पनी लिमिटेड, साल्ट ट्रेडिङ कर्पोरेसन व कृषि नाप पशुपन्छी विकास मन्त्रालय मातहतया दुग्ध विकास संस्थान नापं सहकार्य याना सहुलियत भावं पसः सञ्चालन यायेत्यःगु खः।

थुगु सुपथ मूल्य पसः थ्व हे वइगु मंसिर ३ गतेतक सञ्चालन जुइगु धका उद्योग, वाणिज्य लिसे आपूर्ति मन्त्रालयं धाःगु दु। खाद्य व्यापार कम्पनीं ४२ जिल्लाय् ४८ गु थासय् सुपथ मूल्य पसः सञ्चालन यायेगु तयारी याःगु दु। स्वनिगः दुने रामशाहपथ, थापाथली, नख्खु व ख्वपया सूर्यविनायक लिसे थीथी जिल्लाय् बिक्री कक्षपाखे सहुलियत भावं खाद्यान्न उपलब्ध याइगु जुगु दु।

अथेहे साल्ट्र ट्रेडिङं स्वनिगलय् सतुंगल, कालीमाटी, पाटन, जडीबुटी, कौशलटार, ख्वप व सिफलनापं देयन्यकं च्वंगु कार्यालयपाखे सहुलियत पसः सञ्चालन यायेत्यःगु खः। उगु पसलय् उपभोक्ता तयेसं जाकि, दाल, छवंँ, आटा, छूचूं नाप दक्को प्रकारया चिकं न्यायेगु दइ।

साल्ट ट्रेडिङं चिनी किलों ९७ रुपैयाँ बिक्री याइगु जुगु दु। चिं किलों नितका व चिकं नाप बजि किलोय् न्ह्यतका छुट बिइगु जुगु दु। दुग्ध विकास संस्थानं ध्यः किलोय् नीतका, पनिरय् २ सय ग्रामय् नीतका छुट बिइगु जुगु दु।

Categorized in राष्ट्रिय