२०८१ बैशाख १०, सोमबार

लागू वासः कारोबारय् संलग्न प्यम्हेसित प्रहरीं ज्वन

लहनान्युज | कौलाथ्व तृतीया ११४३, असोज ३० मंगलवाः

अवैध लागू वासः कारोबारय् संलग्न प्यम्हेसित प्रहरीं ज्वंगु दु।

ख्वप नगरपालिका–२ या औद्योगिक क्षेत्र न्ह्यने चेकजाँच यायेगु झ्वलय् वंगु असोज २३ गते प्रहरीं सुर्यविनायक नगरपालिका–६ या सुशान्त अर्याल याःगु स्कुटरया डिकीइ लागु वासः तयातःगु लुइकूगु खः ।

अर्यालयात ज्वनां अनुसन्धान यायेगु झ्वलय् मेपि स्वम्हेसित लागु वासः कारोबारय् संलग्न दुगुलि उमित ज्वनागु खः धका ख्वपया डिएसपी बसन्त पाठकं जानकारी बिःगु दु। प्रहरीं मध्यपुरथिमि नगरपालिका–३ पाखे येँया कृष्णकुमार दास व येँया सिनामंगलय् च्वना च्वम्ह सप्तरीया दिपेन्द्रकुमार यादवयात ज्वंगु खः।

अथेहे, अनुसन्धानया झ्वलय् सप्तरीया जितेन्द्रकुमार रमनयात न प्रहरीं ज्वंगु दु। प्रहरीया कथं अर्यालया नापं नोर्फिन –४५ एम्पुल, डाईजोपाम – ४५ एम्पुल, फेनेरागन –४५ एम्पुल, छ्यला मतगु सिरिन्ज – छगु व छ्यला तःगु खुगु सिरिन्ज लागू वास बरामद याःगु खः।

अथेहे, दास व यादवया नापं डायजपाम १२५ एम्पुल, बुप्रिनोर्फिन १२५ एम्पुल व प्रोमेथोजिन १२५ उम्पुल नापं ज्वनागु धका डिएसपी पाठकं जानकारी बिःगु दु। उमित ज्वना जिल्ला प्रहरी परिसरय् तया माःगु अनुसन्धान जुयाच्वंगु दु धका प्रहरीं धाःगु दु।

Categorized in अपराध