यलया प्रतिष्ठित ब्याड्मिन्टन कासा कथं कयातःगु यल कप रनिङ शिल्डया १३ क्वःगु संस्करण थ्व हे वइगु शनिवाः निसे सुरु जुइगु दु।

यलय् थुगु कासा २०६५ य् न्हापागु कासा जुगु खः। थुगु पटक कासा ओकुबहाः न ग्वसाः ग्वइगु जुगु दु। ओकुबहाः टोल सुधार समिति व महाबुद्ध यूथ क्लबया मंकाः ग्वसालय् छवाः तक कासा न्ह्याइगु जूगु दु।

थुगु कासाय् यलया ७० गु त्वालय् निसः स्वया अप्पो कासापि तयेसं ब्बति काइगु जुगु दु। ग्वसाः खलः महाबुद्ध क्लबया अध्यक्ष डिल्चन शाक्यं यल कपं यक्को हे अन्तर्राष्ट्रिय कासामि उत्पादन जुइ धुकुगु दु धका थौं जूगु पत्रकार सम्मलेनपाखे जानकारी बिःगु दु।

अथेहे ओकुबहाः सुधार समितिया अध्यक्ष यशकुमार शाक्यं यु १५ ब्वाइज, मेन्स डबल्स, भेट्रान्स मेन्स डबल्स, मिक्स डबल्स व याकं मिसा याना न्यागू इभेन्टया कासा जुइ धका  जानकारी बिःगु दु। थुगु कासाया मू इभेन्टया कथं मेन्स डबल्स त्याकूपिन्त ट्रफी नापं ५० हजार रुपियाँ लःल्हाइगु जूगु दु। अथेहे लिउ जूम्हेसित २५ हजार व लिया ल्यू  जूपिन्त झीद्धः झीद्ध लःल्हाइगु जुगु दु। अथेहे यु १५ य् न्हाप जूपिन्त २५ हजार, लिउ जूपिन्त १५ हजार व लिया ल्यू जूपिं निम्हेसित न्याद्धः न्याद्धः बिइगु जूगु दु।

मिक्स डबल्सया शीर्ष स्वंगु थासय् च्वपिन्त २५, १५ व न्याद्धः बिइगु जूगु दु। अथेहे भेट्रान्सय् न्हाप जूम्हेसित २०, लिउ यात झीद्धः व लियाल्यु जूपिन्त न्याद्धः न्याद्धः व याक मिसा न्हापं जूम्हेसित १५, लिउ जूम्हेसित झीद्धः व सेमिफाइनलय् बूपिं निम्हेसित न्याद्धः न्याद्धः बिइगु जूगु दु। थुगु कासाया मुक्कं बजेट साढे ३० लाख रुपिया स्वया अप्पो जुइ धका थौं जूगु पत्रकार सम्मलेनय् जानकारी बिःगु दु।

Categorized in कासा